વડોદરા,ડભોઇ રોડ વુડાના મકાનમાં ટેમ્પામાં બેસીને અવાજ કરતા યુવકોને સમજાવવા ગયેલી મહિલા પર ધારદાર હથિયાર વડે હુમલો થયો હતો.
ડભોઇ રોડ વુડાના મકાનમાં રહેતા હરખીબેન અશોકભાઇએ વાડી પોલીસ સ્ટેશનમાં ફરિયાદ નોંધાવી જણાવ્યું છે કે, ગઇકાલે રાત્રે ૧૦ વાગ્યે મારા પતિ તેમનો ટેમ્પો લઇને ઘરે આવ્યા હતા. ટેમ્પો નીચે પાર્ક કરી તેઓ ઘરે આવ્યા હતા. સાડા દશ વાગ્યે હું તથા મારો પરિવાર જમવા બેઠો હતો. તે દરમિયાન બહારથી અવાજ આવતા હું ગેલેરીમાં જોવા ગઇ હતી. ત્યારે બે વ્યક્તિઓ ટેમ્પામાં બેઠા હતા અને ટેમ્પો ખખડાવતા હતા. હું નીચે જોવા ગઇ ત્યારે ટેમ્પામાં વિક્કી તથા અન્ય એક યુવક બેઠા હતા. મેં તેઓની પાસે જઇને કહેતા વિક્કીએ ઉશ્કેરાઇને ધારદાર હથિયાર વડે મને કપાળના ભાગે ઇજા પહોંચાડી હતી. મેં બૂમાબૂમ કરતા વિક્કીએ મને મોંઢાના ભાગે મુક્કો મારી દીધો હતો અને ત્યારબાદ ભાગી ગયો હતો.
