૧૬ વર્ષ અગાઉ કલ્પસર યાંત્રિક સેલની કચેરીના
કચેરીમાં ભાડેથી અપાયેલા વાહનોના બિલ પેટે રૃપિયા ચાર હજારની લાંચ લેતા પકડાયા હતા ઃ ગાંધીનગર કોર્ટનો ચુકાદો
ગાંધીનગર : ગાંધીનગરમાં કલ્પસર યાંત્રિક સેલની કચેરીના તત્કાલીન નાયબ
કાર્યપાલક ઇજનેરને ૪૦૦૦ રૃપિયાની લાંચ લેતા એસીબી દ્વારા ઝડપી લેવામાં આવ્યા હતા
અને જે સંદર્ભે ગુનો દાખલ થયા બાદ ગાંધીનગર કોર્ટમાં કેસ ચાલ્યો હતો અને સરકારી
વકીલની દલીલોને રાખીને કોર્ટે આરોપીને દોઢ વર્ષની સજાનો હુકમ કર્યો છે.
ગાંધીનગરમાં લાંચિયા
અધિકારી કર્મચારીઓ વધી રહ્યા છે ત્યારે ૧૬ વર્ષ અગાઉ ૪૦૦૦ રૃપિયાની લાંચ લેવાના
ગુનામાં ગાંધીનગર કોર્ટ દ્વારા તત્કાલીન નાયબ કાર્યપાલક ઇજનેરને દોઢ વર્ષની કેદની
સજાનો હુકમ કર્યો છે. જે ઘટના સંદર્ભે મળતી વિગતો પ્રમાણે ગાંધીનગરમાં આવેલી
કલ્પસર યાંત્રિક સેલની કચેરી ખાતે વર્ષ ૨૦૦૮માં નાયબ કાર્યપાલક ઇજનેર તરીકે ફરજ
બજાવતા નટવરભાઈ વિઠ્ઠલભાઈ પટેલ દ્વારા તેમની કચેરીમાં વારાહી ટ્રાવેલ્સની ભાડાની
રાખવામાં આવેલી વાહનોના બિલ મંજુર કરવા પેટે ૪,૦૦૦ની લાંચ માગવામાં
આવી હતી. જેથી ફરિયાદી આ લાંચ આપવા માગતા ન હતા અને એસીબીનો સંપર્ક કરતા નટવરભાઈ
પટેલને ૪૦૦૦ રૃપિયાની લાંચ લેતા રંગે હાથ ઝડપી લેવામાં આવ્યા હતા. જે સંદર્ભે ગાંધીનગર
એસીબીમાં ભ્રષ્ટાચાર નિવારણ અધિનિયમ હેઠળ ગુનો દાખલ કરવામાં આવ્યો હતો અને આ કેસ
ગાંધીનગરના ચોથા એડિશનલ ડિસ્ટ્રિક્ટ સેશન્સ કોર્ટમાં ચાલ્યો હતો. જ્યાં સરકારી
વકીલ પ્રિતેશ ડી વ્યાસ દ્વારા દસ્તાવેજી,
લેખિત અને મૌખિક પુરાવા રજૂ કરીને દલીલ કરવામાં
આવી હતી કે, આરોપીએ સરકારી કર્મચારી હોવા છતાં લાંચ લીધી છે.
જેથી તેને કાયદામાં દર્શાવેલી સજા કરવામાં આવે. જેના પગલે કોર્ટ દ્વારા આ દલીલોને
ગ્રાહ્ય રાખીને આરોપી નટવરભાઈ વિઠ્ઠલભાઈ પટેલને દોઢ વર્ષની કેદની સજા અને ૧૦ હજાર
રૃપિયાનો દંડ ફટકારવામાં આવ્યો છે.
