અમદાવાદ,શનિવાર
ભાવનગરના શિહોરમાં તાલુકા પંચાયતમાં કલસ્ટર કો. ઓર્ડીનેટરની નોકરીમાં યુવકને પરત લેવાના બદલામાં વિસ્તરણ અધિકારીએ રૂપિયા બે લાખની લાંચની માંગણી કરી હતી. જે અનુસંધાનમાં વિસ્તરણ અધિકારીના કહેવાથી રૂપિયા દોઢ લાખની રકમ લેતા બોડકદેવ પોલીસ સ્ટેશનના કોન્સ્ટેબલ અને ખાનગી વ્યક્તિને એસીબીએ ટ્રેપ ગોઠવીને ઝડપી લીધા હતા. જ્યારે વિસ્તરણ અધિકારી તેમજ અન્ય વ્યક્તિની શોધખોળ શરૂ કરી કરી છે. જે અગે એસીબીએ તપાસ શરૂ કરી છે.
ભાવનગરમાં રહેતા એક વ્યક્તિ ભાવનગરમાં આવેલા શિહોરમાં તાલુકામાં પંચાયતમાં કલસ્ટર કો.ઓર્ડીનેટર તરીકે નોકરી કરતા હતા. કોઇ કારણસર તેમને નોકરીમાંથી છુટા કરવામાં આવ્યા હતા. તે વ્યક્તિને નોકરીમાં પરત લેવા, બાકીનો પગાર આપવા અને પોલીસ કેસ નહી નોંધવાના બદલામાં તાલુકા પંચાયતના વિસ્તરણ અધિકારી દથરથભાઇ ચૌહાણે યુવક પાસે બે લાખની રોકડની માંગણી કરી હતી.
જે પૈકી પહેલા દોઢ લાખ લેવાનું નક્કી થતા દશરથભાઇએ અમદાવાદમાં બોડકદેવ પોલીસ સ્ટેશનમાં કોન્સ્ટેબલ તરીકે ફરજ બજાવતા ઋતુરાજસિંહ પરમારને કહીને પ્રહલાદનગર જઇને દોઢ લાખ રૂપિયા લેવા માટે કહ્યુ હતું.
જ્યાં અન્ય જીગર ઠક્કર નામનો વ્યક્તિ પણ હાજર હતો. આ સમયે અગાઉથી એસીબીમાં જાણ કરવામાં આવી હોવાથી ગોઠવવામાં આવેલી ટ્રેપમાં ઋતુરાજસિંહ અને જીગર ઠક્કરને દોઢ લાખની રોકડ લેતા ઝડપી લેવામાં આવ્યા હતા. આ અંગે દશરથભાઇ ચૌહાણ અને શિહોરમાં રહેતા વિરેન્દ્રસિંહ ગોહેલની ધરપકડ કરવા તજવીજ હાથ ધરી છે.
