Nadiad Pocso Court Verdict : ખેડા જિલ્લાની નડિઆદ સ્પેશિયલ પોક્સો કોર્ટે બાળકીઓ અને મહિલાઓ વિરુદ્ધ થતા ગંભીર ગુનાઓ સામે લાલ આંખ કરી એક દાખલારૂપ ચુકાદો સંભળાવ્યો છે. મહેમદાવાદ તાલુકાના વરસોલા ગામની સગીરાનું અપહરણ કર્યા બાદ તેના પર દુષ્કર્મ ગુજારવાના અતિ ગંભીર કેસમાં કોર્ટે આરોપીને કસૂરવાર ઠેરવ્યો છે. નડિયાદની સ્પે. પોક્સો અદાલતે ગુનેગારને 20 વર્ષની સખત કેદ અને કુલ રૂ. 35 હજારનો આર્થિક દંડ પણ ફટકાર્યો છે.
કેસની વિગત શું હતી?
આ કેસની વિગત એવી છે કે, ગત તારીખ 11/06/2021ના રોજ ખેડા જિલ્લાના મહેમદાવાદ તાલુકાના વરસોલા ગામેથી આરોપી સદ્દામ હુસૈન મલેકે ફરિયાદીની સગીર વયની દીકરીને લગ્ન કરવાની લાલચ આપી અપહરણ કર્યા બાદ, તેની સાથે બળાત્કાર ગુજાર્યો હતો. આરોપી સગીરાને પોતાની મોટરસાયકલ પર બેસાડીને આંતરસુંબા પાસે નદીના કોતરોમાં લઈ ગયો હતો. જ્યાં તેણે રાત્રિ દરમિયાન સગીરાની મરજી વિરૂદ્ધ અવારનવાર બળાત્કાર ગુજારી તેનું શારીરિક શોષણ કર્યું હતું. આ અંગે મહેમદાવાદ પોલીસ સ્ટેશનમાં ફરિયાદ નોંધાતા પોલીસે IPC (ઈ.પી.કો.)ની કલમ 363, 366, 376(2) તથા પોક્સો એક્ટ-2012ની કલમ 18, 3(એ), 4, 5(એલ) હેઠળ કેસ દાખલ કર્યો હતો.
કોર્ટની કાર્યવાહી અને સજાની વિગતો
નડિઆદની સ્પેશિયલ પોક્સો કોર્ટમાં આ કેસ ચાલવા ઉપર આવતા, સરકારી વકીલ તરફથી રજૂ કરવામાં આવેલા મજબૂત દસ્તાવેજી પુરાવાઓ અને સાક્ષીઓની જુબાનીઓ તેમજ ધારદાર દલીલોને ધ્યાને રાખીને સેશન્સ જજે આરોપીને કસૂરવાર ઠેરવી સજા ફટકારી હતી. કોર્ટે પોક્સો એક્ટની કલમો હેઠળ 20 વર્ષની સખત કેદની સજા અને રૂપિયા 35 હજારનો દંડ તેમજ જો દંડ ના ભરે તો વધુ 1 વર્ષની સખત કેદની સજા ફટકારી હતી.આ સાથેજ કોર્ટે ભોગ બનનાર સગીરાને સરકારના ઠરાવ મુજબ રૂપિયા 1,00,000 વળતર પેટે ચૂકવવાનો પણ મહત્વનો હુકમ કર્યો છે.
