બે ડી.જે.ની હરીફાઈમાં શિષ્ટાચારને શર્મસાર કરતી ઘટના
પરવાનગી વગર તીવ્ર અવાજે ડી.જે. વગાડવા બદલ ઢુંણાદરાના અને ભેટાસીના સંચાલક સામે પણ ગુનો
નડિયાદ: નડિયાદ તાલુકાના ટુંડેલ ગામે લગ્ન પ્રસંગમાં બે ડી.જે. વચ્ચેની હરીફાઈમાં જાહેર મર્યાદાના લીરેલીરા ઉડાવતી ઘટના સામે આવી છે. વરઘોડામાં એક યુવકે નિર્લજ્જ બની નગ્નતા પ્રદશત કરી અશ્લીલ હરકતો કરતા તેનો વિડિયો સોશિયલ મીડિયામાં વાયરલ થયો હતો. આ મામલે વસો પોલીસે જાતે ફરિયાદી બની મુખ્ય સૂત્રધાર મહેશ વાઘેલા સહિત ૧૧ શખ્સો સામે ગુનો નોંધી કાર્યવાહી હાથ ધરી છે.
નડિયાદ તાલુકાના ટુંડેલ ગામે એક લગ્ન પ્રસંગમાં માનવતા અને જાહેર શિષ્ટાચારને શર્મસાર કરતી ઘટના સામે આવી છે. ટુંડેલ ગામના વખતપુરા સીમ વિસ્તારમાં ગત ૫ ફેબુ્રઆરીના રોજ આયોજિત એક લગ્ન પ્રસંગમાં ડી.જે.ના વરઘોડા દરમિયાન બે જૂથો વચ્ચે સંગીતના અવાજ બાબતે હરીફાઈ જામી હતી. આ દરમિયાન નશામાં કે ઉત્તેજનામાં આવી ગયેલા મહેશ વિક્રમ વાઘેલા નામના યુવકે જાહેર માર્ગ પર જ પોતાનું પેન્ટ ઉતારી દઈને બીભત્સ ચેનચાળા કર્યા હતા, જેનો વીડિયો સોશિયલ મીડિયામાં વાયરલ થતા વસો પોલીસે જાતે ફરિયાદી બની ગુનો દાખલ કર્યોે છે.
વસો પોલીસ સ્ટેશનના હેડ કોન્સ્ટેબલ ધર્મેન્દ્રકુમાર ધનજીભાઈને સોશિયલ મીડિયા એપ મારફતે એક વિડીયો પ્રાપ્ત થયો હતો. આ વિડીયોમાં બે ડી.જે. સામસામે ઉભેલા જોવા મળતા હતા અને તેના પર સવાર માણસો ઉશ્કેેરાટમાં આવીને એકબીજાને હાથના બીભત્સ ઈશારાઓ કરતા નજરે પડતા હતા. તપાસ દરમિયાન જાણવા મળ્યું હતું કે, આ બનાવ ૫ ફેબુ્રઆરીના રોજ ટુંડેલ ગામના વખતપુરા સીમ વિસ્તારમાં રહેતા ઘનશ્યામભાઈ મણીભાઈ વાઘેલાની દીકરીના લગ્ન પ્રસંગનો હતો.
આ પ્રસંગે ‘બંકો’ ડી.જે. મંગાવવામાં આવ્યું હતું, જ્યારે જાન પક્ષ તરફથી ‘મહાકાલ’ ડી.જે. લાવવામાં આવ્યું હતું. બપોરના ૩થી ૪ વાગ્યાના સમયગાળામાં બંને ડી.જે. સામસામે આવી જતાં તીવ્ર અવાજે સંગીત વગાડવાની હરીફાઈ શરૂ થઈ હતી. આ સ્પર્ધામાં ઉશ્કેરાઈ ગયેલા મહેશ વાઘેલાએ બંકો ડી.જે. પર ચઢી જઈને જાહેરમાં અશ્લીલ વર્તન કર્યું હતું. પોલીસે મહેશ વાઘેલાની પૂછપરછ કરતા તેણે આ ગુનાની કબૂલાત કરી હતી અને તેની સાથે આ કૃત્યમાં સામેલ અન્ય મિત્રોના નામ પણ આપ્યા હતા. આ મામલે પોલીસે મહેશ વિક્રમ વાઘેલા, હસમુખ વિષ્ણુ વાઘેલા, વિશાલ અશોક વાઘેલા, હેમેન્દ્ર સુરેશ વાઘેલા, રમેશ કનુ પરમાર, જીતેન્દ્ર અરવિંદ વાઘેલા, હરેશ વાઘેલા અને હિતેન નરેન્દ્ર વાઘેલા વિરુદ્ધ નામજોગ ગુનો નોંધ્યો છે. આ ઉપરાંત પરવાનગી વગર તીવ્ર અવાજે ડી.જે. વગાડવા બદલ બંકો ડી.જે. ઢુંણાદરાના સંચાલક અને મહાકાલ ડી.જે. ભેટાસીના સંચાલક તેમજ તેના પર સવાર અન્ય અજાણ્યા શખ્સો સામે પણ કલેક્ટરના જાહેરનામાના ભંગ બદલ ફરિયાદ નોંધી વધુ તપાસ હાથ ધરી છે.
