અમદાવાદ, બુધવાર
પૂર્વ વિસ્તારમાં લૂખ્ખા તત્વોને જાણે કે પોલીસનો કોઇ ડર જ ના હોય તે જાહેરમાં નિર્દોષ લોકો ઉપર હુમલા કરવામાં આવી રહ્યા છે. ખોખરામાં ગઇકાલે મોડી રાતે એક્ટિવા ઉપર જઇ રહેલા બે યુવકોને રોકીને પટ્ટાથી મારવામાં આવ્યા હતા જો કે બેલેન્સ જતાં બન્ને યુવકો રોડ ઉપર પટકાયા હતા ત્યારબાદ બાઇક ઉપર આવેલા છ શખ્સોએ એક યુવકને ઢોર માર મારીને પેટમાં છરી મારીને લોહી લુહાણ કરીને આરોપીઓ ધમકી આપીને નાસી ગયા હતા.
જીવલેણ હુમલો કરતાં લોહી લુહાણ હાલતમાં યુવકને ઓપરેશન કરવું પડયું, ખોખરા પોલીસ દ્વારા ગુનો નોંધી સીસીટીવી ફૂટેજ આધારે તપાસ
ઘોડાસર વિસ્તારમાં યુવકે ખોખરા પોલીસ સ્ટેશનમાં નિરંજભાઇ સહિત છ લોકો સામે ફરિયાદ નોંધાવી છે કે ગઇકાલે યુવક તેના મિત્ર સાથે એક્ટિવા ઉપર બેસીને ખોખરા સર્કલ પાસે સોની બજારથી પસાર થઇ રહ્યા હતા આ સમયે બાઇક ઉપર છ લોકો આવ્યા હતા અને અંગત અદાવતમાં પટ્ટાથી મારવા જતાં બેલેન્સ જતાં બન્ને યુવકો રોડ ઉપર પટકાયા હતા.
મિત્ર બાલભવન બાજુ ભાગવા જતાં તેને ત્યાં રોકીને છરીથી જીવલેણ હુમલો કરતાં યુવક લોહી લુહાણ થઇ ગયો હતો જતાં જતાં આરોપીએ જાનથી મારી નાખવાની ધમકી આપી હતી. ગંભીર હાલતમાં ફરિયાદીના મિત્રને સારવાર માટે એલ.જી.હોસ્પિટલમાં દાખલ કરવામાં આવ્યો હતો જ્યાં ઓપરેશન કરવું પડયું હતું, જ્યારે ફરિયાદી યુવકને પણ પગે ઇજા થતાં સારવાર લેવી પડી હતી. ખોખરા પોલીસે રાયોટિંગ તથા હત્યાની કોશિષનો ગુનો નોેધીને આસપાસના સીસીટીવી ફૂટેજ આધારે તપાસ શરુ કરી છે.
