Noida: ઉત્તર પ્રદેશના નોઈડાથી સંબંધોને લજવતો એક સંવેદનશીલ મામલો સામે આવ્યો છે. અહીં પિતરાઈ ભાઈ સાથે શારીરિક સબંધ બાંધ્યા બાદ 18 વર્ષની છોકરી ગર્ભવતી થઇ ગઈ. ત્યારબાદ તેને ગર્ભપાતની ગોળીઓ પીવડાવી દીધી, જેના કારણે તબિયત ખરાબ થયા બાદ તેનું મૃત્યુ થઈ ગયું છે. દિલ્હીની સફદરજંગ હોસ્પિટલમાં તેણે દમ તોડ્યો છે. આ ઘટના અંગે સૂચના મળતાં જ પોલીસ ઘટનાસ્થળે પહોંચી અને તપાસનો ધમધમાટ શરૂ કર્યો છે.
છોકરીને બળજબરીથી ગર્ભપાતની ગોળીઓ પીવડાવી
યુવતીના પરિવારનો આરોપ છે કે, છોકરીને બળજબરીથી ગર્ભપાતની ગોળીઓ પીવડાવી હતી, જેના કારણે તેની હાલત વધુ ખરાબ થઈ ગઈ અને સારવાર દરમિયાન તેનું મોત થઈ ગયું. મૃતકના પિતાએ આરોપી વિરુદ્ધ કેસ દાખલ કરાવ્યો છે.
પરિવારે કરી પોલીસ ફરિયાદ
પરિવારે પોલીસને કરેલી ફરિયાદમાં જણાવ્યું છે કે, યુવતીના તેના પિતરાઈ ભાઈ સાથે શારીરિક સંબંધો હતા, ત્યારબાદ તે ગર્ભવતી થઈ હતી. આરોપ છે કે, તેના પિતરાઈ ભાઈએ પ્રેગ્નન્સી છુપાવવા માટે તેને ગર્ભપાતની ગોળીઓ પીવડાવી દીધી હતી. ગોળી પીધા બાદ યુવતીની તબિયત અચાનક બગડી ગઈ.
આ દરમિયાન છોકરીના પરિવારે 18 ડિસેમ્બરે તેને નોઈડાની એક હોસ્પિટલમાં દાખલ કરી હતી. ડોક્ટરોએ તેની ગંભીર હાલત જોતાં પ્રાથમિક સારવાર બાદ તેને દિલ્હીની સફદરજંગ હોસ્પિટલમાં રિફર કરી હતી. ત્યાં ઘણા દિવસોની સારવાર છતાં 23 ડિસેમ્બરે છોકરીનું મોત થઈ ગયું.
આ પણ વાંચો: ભારત માટે પોતાના જ દેશના વિદેશ મંત્રી સાથે બાખડી પડ્યા ન્યૂઝીલેન્ડના PM, FTA મુદ્દે રોકડું પરખાવ્યું
પોલીસે આરોપી પિતરાઈ ભાઈની ધરપકડ કરી
આ સમગ્ર મામલે મૃતક યુવતીના પિતાએ સેક્ટર-39 પોલીસ સ્ટેશનમાં લેખિત ફરિયાદ નોંધાવી છે. ફરિયાદના આધારે પોલીસે આરોપી પિતરાઈ ભાઈ વિરુદ્ધ ગુનો નોંધીને તેની ધરપકડ કરી લીધી છે. હાલમાં આરોપીની પૂછપરછ કરવામાં આવી રહી છે. પોલીસ અધિકારીઓનું કહેવું છે કે પોસ્ટમોર્ટમ રિપોર્ટના આધારે કેસની વધુ તપાસ કરવામાં આવી રહી છે અને તપાસ બાદ આગળની કાયદેસરની કાર્યવાહી હાથ ધરવામાં આવશે.
