– બિહારના ચૂંટણી પરિણામો મુદ્દે સોશિયલ મીડિયા પર ટિખળો
– મોદી, નીતીશને પંચાયત વેબ સીરિઝના પ્રખ્યાત ડાંસ સાથે જોડી વીડિયો વાયરલ કરાયો, પ્રશાંત કિશોરને પણ લોકોએ ઘેર્યા
પટણા : બિહાર વિધાનસભાની ચૂંટણીના પરિણામો જાહેર થતા જ સોશિયલ મીડિયા પર મીમ્સનું ઘોડાપૂર આવ્યું હતું. લોકોએ કોંગ્રેસની હાર પર દેશના પ્રથમ વડાપ્રધાન જવાહરલાલ નેહરુને તેમના જન્મ દિવસ પર યાદ કર્યા હતા. જ્યારે કેટલાકે ભાજપ-જદ(યુ)ની જીતને પંચાયતની વેબ સીરીઝના ભુષણ અને ધારાસભ્યના ડાંસ સાથે સરખામણી કરી હતી.
૧૪મીએ બિહારની ચૂંટણીના પરિણામો જાહેર કરાયા હતા જ્યારે આ જ દિવસે દેશના પ્રથમ વડાપ્રધાન જવાહરલાલ નેહરુનો જન્મ દિવસ પણ છે. જેને પગલે મીમ્સમાં નેહરુને પણ સામેલ કરી લેવાયા હતા જેમાં એક મીમમાં નેહરુની એડિટ કરેલી તસવીર સાથે લખવામાં આવ્યું હતું કે પોતાના જન્મ દિવસે કોંગ્રેસની કારમી હાર નિહાળી રહેલા નેહરું.
અન્ય એક એડિટ કરેલો વીડિયો સોશિયલ મીડિયા પર વાયરલ થઇ રહ્યો છે જેમાં પંચાયત વેબ સીરિઝના પ્રખ્યાત ડાંસમાં નરેન્દ્ર મોદીને વિધાયકના પાત્રમાં જ્યારે નીતીશ કુમારને ભુષણના પાત્રમાં દેખાડવામાં આવ્યા હતા. પ્રશાંત કિશોર પર ટોણો મારતા એક પોસ્ટર વાયરલ કરાયું હતું જેમાં ૩ ઇડિયટ્સના રાજુ રસ્તોગીના પરિણામ ચેક કરતા સીનને દેખાડાયો હતો. અન્ય એક પોસ્ટરમાં પ્રશાંત કિશોર કહે છે બહુત પીછે રેહ ગયા મૈ ભાઇ? લોકોએ સોશિયલ મીડિયા પર આ મીમ્સ જાહેર કરીને એક તરફ નીતીશ કુમાર, નરેન્દ્ર મોદીના વખાણ કર્યા હતા જ્યારે બીજી તરફ તેજસ્વી યાદવ, રાહુલ ગાંધી અને પ્રશાંત કિશોરની ભારે મજાક ઉડાવી હતી.
