પોલીસની અલગ – અલગ ટીમોએ આજે મોડી રોત્રે નવલખી મેદાનના ત્રણ નાકા બ્લોક કરી ટોર્ચ લાઈટ વડે મેદાનમાં અને વાહનોની તલાશી લઈ બ્રેથ એનેલાઇઝરથી આકસ્મિક ચેકિંગ હાથ ધર્યુંહતું. અવાવરુ જગ્યા પર લોકો ન બેસે તે માટે જાગૃતિનો પ્રયાસ કરી અસામાજિક તત્ત્વોને પાઠ ભણાવવા અન્ય સ્થળોએ પણ આ પ્રકારે આકસ્મિક ચેકિંગ હાથ ધરાશે.
પોલીસ કિંમશનરની સૂચનાથી અધિક પો. કિંમશનર ડૉ. લીના પાટિલની ઉપસ્થિતિમાં ડી.સી.પી. ઝોન – ૨ મંજીતા વણઝારા, ઝોનના તમામ પીઆઈ, એસીપી તથા ક્રાઈમની ટીમો કાર્યવાહીમાં રહી હતી. દરમિયાન બે શખ્સો સામે પ્રોહિબિશનનો કેસ પણ કરાયો છે. મોડીરાત સુધી ચેકિંગની કાર્યવાહી કરવામાં આવી હતી. આ અંગે ડૉ. લીના પાટિલનું કહેવું હતું કે, નવલખી મેદાનમાં કેટલાક અસામાજિક તત્વો અડિંગો જમાવતા હોયછે. કોઈ બનાવ ન બને તેને ધ્યાનમાં રાખી સરપ્રાઈઝ ચેકિંગ કર્યું છે. ૧૦૦થી વધુ પોલીસ અધિકારી અને કર્મચારીઓ ચેકિંગ કરી રહ્યા છે. વડોદરાવાસીઓની સુરક્ષા માટે પોલીસ ખડે પગે છે. આગામી દિવસોમાં અલગ – અલગ સ્થળોએ આ પ્રકારે સરપ્રાઈઝ ચેકિંગ કરાશે. મેદાનમાંથી એક ફેમિલી મળી આવતા તેમને સમજ આપી હતી કે, જ્યાં લોકોની હાજરી ન હોય તેવી જગ્યાએ જવાનું ટાળવું જોઈએ. લોકોમાં સુરક્ષાની ભાવના જાગૃત થાય તે અમારો મુખ્ય હેતુ છે. અત્રે યાદ અપાવવું જરૂરી છે કે, ત્રણ દિવસ અગાઉ નવલખી મેદાનમાં બેઠેલા પ્રેમી પંખીડાને પોલીસકર્મી સહિતની ત્રિપુટીએ કાયદાનો રોફ જમાવી પ્રેમીને માર મારી મોપેડ સળગાવી નાખવાની ઘટના ઘટી હતી.
