તરૂણીને કોઈ વસ્તુ ખવડાવી અર્ધબેભાન કરી અવાર-નવાર દુષ્કર્મ ગુજાર્યાનો આરોપ : પાટીદાર ચોકમાં ઓફિસ ધરાવતા આરોપીની ધરપકડ
રાજકોટ, : રાજકોટમાં માત્ર 16 વર્ષની તરૂણીને ફિલ્મમાં હિરોઈન બનાવવાની લાલચ આપી રાજકોટના ફિલ્મ પ્રોડયુસર કમ ડાયરેકટર કમ એકટર જયેશ હંસરાજભાઈ ઠાકોર (ઉ.વ. 32, રહે. માધવ બંગલો, રેલનગર) એ અવાર-નવાર દૂષ્કર્મ ગુજાર્યાની ગાંધીગ્રામ-2 પોલીસ મથકમાં ફરિયાદ નોંધાઈ છે. જેના આધારે પોલીસે પોકસો સહિતની કલમો હેઠળ ગુનો નોંધી આરોપીની ધરપકડ કરી હતી. ઓફિસમાં આરોપી સાથે મુલાકાત થતાં કહ્યું કે થોડા દિવસ પછી ઓડિશન માટે બોલાવીશ. આ પછી તેની માતાનો મોબાઈલ નંબર લીધો હતો. જેના પર કોલ કરી ઓડિશન માટે બોલાવતાં માતા સાથે ગઈ હતી.
ઓડિશન બાદ આરોપીએ કહ્યું કે તમારે થોડા ડાયલોગની પ્રેકટીસની જરૂર છે, જેથી તમારે કલાસીસમાં પ્રેકટીસ કરવા આવવું પડશે, દોઢ મહિના પછી મારા મુવીનું શુટીંગ છે, જો તમને એકટીંગ સરખી આવડી જશે તો મુવીમાં હિરોઈનનો રોલ આપીશ. આ વાતચીત બાદ આરોપીની ઓફિસમાં પ્રેકટીસ માટે જતી હતી. એક દિવસ આરોપીએ તેને બાથમાં ભીડી કિસ પણ કરી હતી. જેથી તેણે પ્રેકટીસમાં જવાની ના પાડતાં આરોપીએ તેની માતાને કોલ કરી કહ્યું કે હમણાં મુવીનું શુટીંગ કરવાનું છે, એટલે તમારી દીકરીને પ્રેકટીસમાં મોકલો. જેથી માતાના કહેવાથી ફરીથી પ્રેકટીસમાં જવા લાગી હતી.
આરોપીએ એક મુવી બનાવી તેને રોલ આપ્યો હતો. શુટીંગ દરમિયાન બીજી યુવતી પણ આવતી હતી. ફિલ્મનું શુટીંગ રાજકોટમાં દોઢ મહિના ચાલ્યું હતું. શુટીંગ પુરૂ થઈ ગયા બાદ આરોપી તેને ઈવેન્ટના બહાને ઓફિસે બોલાવી, હિરોઈન બનાવવાની લાલચ આપી, અવાર-નવાર શરીર સંબંધ બાંધતો હતો. ઘણી વખત ખાણીપીણીની વસ્તુ ખવડાવતો હતો. જેને કારણે અર્ધબેભાન જેવી બની ગયા બાદ શરીર સંબંધ બાંધતો હતો. આરોપી તેને પાટીદાર ચોક પાસે આવેલા ફલેટમાં પણ કોઈ વસ્તુ ખવડાવી અર્ધબેભાન કરી શરીર સંબંધ બાંધતો હતો. દોઢ વર્ષના સમયગાળા દરમિયાન ઓફિસ અને ફલેટમાં અર્ધબેભાન કરી અવાર-નવાર શરીર સંબંધ બાંધ્યો હતો. આઠેક માસ પહેલાં કિયા કારમાં રેલનગરમાં આવેલા તેના મકાને લઈ જઈ નાળિયેર પાણી પીવડાવ્યું હતું. જે બાદ બેભાન થઈ જતાં શરીર સંબંધ બાંધ્યો હતો. જે છેલ્લી વખત હતો. આ વાત તેણે તેની સાથે કામ કરતી યુવતીને પણ જણાવી હતી. આરોપી અવાર-નવાર ફોન કરી તેની ઓફિસે બોલાવતો હતો.
ફિલ્મમાં કામ કરવું હોય તો આવું તો કરવું જ પડે
રાજકોટ, : ભોગ બનનાર તરૂણીએ પોલીસને કહ્યુ કે આરોપી તેને ખાણીપીણીની કોઈ વસ્તુ ખવડાવતો હતો. જેને કારણે તે અર્ધબેભાન જેવી થઈ જતાં શરીર સંબંધ બાંધતો હતો. ભાનમાં આવે ત્યારે આવા કામ નહીં કરવાનું કહેતાં આરોપી કહેતો હતો કે કોઈને વાત કરીશ તો મુવીમાં રોલ નહીં આપું, ફિલ્મમાં કામ કરવું હોય તો આવું તો કરવું જ પડે. પરિણામે તેણે કોઈને વાત કરી ન હતી.
