વડોદરાઃ એમ.એસ.યુનિવર્સિટીમાં નવી શિક્ષણ નીતિનો અમલ થયા બાદ હવે ઓનર્સ ડિગ્રીનો વિકલ્પ પસંદ કરનારા વિદ્યાર્થીઓ નવા શૈક્ષણિક વર્ષમાં ચોથા વર્ષમાં અભ્યાસ કરશે.મેડિસિન, ટેકનોલોજી, મેનેજમેન્ટ, ફાર્મસી ફેકલ્ટી અને પોલીટેકનિકને બાદ કરતા અન્ય ફેકલ્ટીઓના સત્તાધીશોને ચોથા વર્ષનો અભ્યાસક્રમ તૈયાર કરવો પડશે.આ માટે આજે યુનિવર્સિટી સત્તાધીશો દ્વારા તમામ ફેકલ્ટી ડીનોની એક બેઠક બોલાવવામાં આવી હતી.
૫૦ ટકા જેટલા વિદ્યાર્થીઓ ત્રણ વર્ષની ડિગ્રીની જગ્યાએ ચોથા વર્ષમાં અભ્યાસ કરીને ઓનર્સ ડિગ્રીનો વિકલ્પ પસંદ કરે તેવી શક્યતા હોવાથી આ બેઠકમાં તમામ ડીનોને મે મહિના સુધીમાં નવો અભ્યાસક્રમ તૈયાર કરવાની ટકોર કરવામાં આવી હતી.
સૂત્રોનું કહેવુ છે કે, તમામ ફેકલ્ટીઓએ આગામી દિવસોમાં બોર્ડ ઓફ સ્ટડીઝની બેઠકો બોલાવવાની કવાયત હાથ ધરી છે.જેમાં ચોથા વર્ષનો અભ્યાસક્રમ મંજૂરી માટે મૂકવામાં આવશે અને એ પછી ઔપચારિકતા ખાતર નવા કોર્સને એક્ઝિક્યુટિવ કાઉન્સિલ અને બોર્ડ ઓફ મેનેજમેન્ટમાં મૂકવામાં આવશે.અધ્યાપકો આગામી ૬ મહિના સુધી વ્યસ્ત રહેશે.કારણકે આ સમયગાળમાં તેમને વિદ્યાર્થીઓ પાસે ઈન્ટર્નશિપ કરાવવાની, નવો અભ્યાસક્રમ તૈયાર કરવાની અને વિદ્યાર્થીઓની પરીક્ષા લેવાની કામગીરી પણ હાથ ધરવી પડશે.
