Image Source: IANS
Bihar Assembly Elections: બિહાર વિધાનસભાની ચૂંટણી અગાઉ વિપક્ષી દળોના મહાગઠબંધન (INDIA બ્લોક)ને એક મોટો ઝટકો લાગ્યો છે. ઝારખંડ મુક્તિ મોરચા (JMM), જે ઝારખંડમાં INDIA ગઠબંધન સરકારનું નેતૃત્વ કરી રહ્યું છે, તેણે બિહારમાં મહાગઠબંધનથી અલગ થઈને ચૂંટણી લડવાનો નિર્ણય લીધો છે.
JMMના મહાસચિવ સુપ્રિયો ભટ્ટાચાર્યએ આ વાતની જાહેરાત કરતા જણાવ્યું કે, પક્ષ હવે બિહારની છ વિધાનસભા બેઠકો પર સ્વતંત્ર રીતે પોતાના ઉમેદવારો ઊભા કરશે. આ છ બેઠકોમાં મુખ્યત્વે ચકાઈ, ધમદાહા, કટોરિયા, પિરપેંતી, મનીહારી અને જમુઈનો સમાવેશ થાય છે.
JMM દ્વારા એકલા ચૂંટણી લડવાના આ નિર્ણયથી મહાગઠબંધનમાં તણાવ વધ્યો છે. અગાઉ, JMM એ ગઠબંધનને બેઠકોની વહેંચણી અંગે અંતિમ નિર્ણય લેવા માટે 14-15 ઓક્ટોબરની સમયમર્યાદા આપી હતી, પરંતુ બેઠકોની વહેંચણીનો મુદ્દો ઉકેલાયો ન હતો. આ જાહેરાત એવા સમયે આવી છે જ્યારે પ્રથમ તબક્કાના ઉમેદવારી પત્રો ભરવાની અંતિમ તારીખ નજીક છે.
દરમિયાન, આરજેડી, કોંગ્રેસ અને ડાબેરી પક્ષોના બનેલા મહાગઠબંધનમાં આંતરિક ઝઘડો વધુ તીવ્ર બન્યો છે. હાલની માહિતી અનુસાર, મહાગઠબંધનના ઘટક પક્ષો સાત બેઠકો પર આમને-સામને છે. આ બેઠકોમાં લાલગંજ, વૈશાલી, રાજાપાકર, બછવાડા, રોસરા અને બિહારશરીફ મુખ્ય બેઠકો છે. આ બેઠકો માટે ઉમેદવારોના નામાંકનથી મહાગઠબંધનની એકતા પર પ્રશ્નો ઉભા થયા છે.
ગઠબંધનમાં સામેલ અન્ય પક્ષોના નેતાઓએ સ્થિતિને શાંત પાડવા અને JMMને પાછા લાવવાના પ્રયાસો શરૂ કર્યા છે. જોકે, ઉમેદવારી પત્રો ભરવાની અંતિમ તારીખ નજીક હોવાથી, આ આંતરિક સંઘર્ષ મહાગઠબંધન માટે મોટી મુશ્કેલી ઊભી કરી શકે છે.
