અમદાવાદ,રવિવાર
અમદાવાદમાં રહેતા એક યુવકને બેંગકોકમાં વર્કમીટના નામે બોલાવ્યા બાદ તેને ગેરકાયદે મ્યાંનમાર લઇ જઇને તેને કોલ સેન્ટર દ્વારા સાયબર ક્રાઇમ કરવાની તાલીમ આપવામાં આવી હતી. પરંતુ, યુવકે ગેરકાયદે કામ કરવાની ના પાડતા તેને ગોંધી રાખીને ભારત પરત આવવા માટે સાડા લાખની માંગણી કરવામાં આવી હતી. જે ઓનલાઇન ટ્રાન્સફર થતા યુવકનો છુટકારો થયો હતો. આ કેસમાં અમદાવાદ સાયબર ક્રાઇમે યુવકને બગકોક મોકલનાર કિંજલ શાહ નામના વ્યક્તિની ધરપકડ કરી છે. જે અભિષેકસિંગ નામના વ્યક્તિની સુચના મુજબ ગુજરાતમાં કામ કરતો હતો. આ અંગે પોલીસે વધુ તપાસ શરૂ કરી છે. જેમાં અનેક મોટા ખુલાસા થવાની શક્યતા છે.
અમદાવાદના પૂર્વ વિસ્તારમા રહેતા એક યુવકને સોશિયલ મિડીયા પર અભિષેકસિંગ નામના વ્યક્તિએ બેંગકોક થાઇલેન્ડમાં આઇટી કંપનીમાં પ્રતિમાસ રૂપિયા એક લાખના પગારની જોબ ઓફર કરી હતી. જેમાં કંપની રહેવા-જમવાની તેમજ ટિકિટની વ્યવસ્થા કરી આપશે તેવી ખાતરી આપવામાં આવી હતી. જેથી યુવકે હા કહેતા અભિષેકસિંગે ગુજરાતમાં તેના વતી કામ કરતા અને વડોદરામાં રહેતા કેયુર શાહ નામના વ્યક્તિની મદદથી યુવકના વિઝા સહિતની પ્રોસેસ કરાવી હતી. પરંતુ, યુવક જ્યારે બેંગકોક પહોંચ્યો ત્યારે એક કારમાં તેને થાઇલેન્ડની બોર્ડર પર લઇ જવાયો હતો. જ્યાં તેનો પાસપોર્ટ જપ્ત કરીને જંગલના વિસ્તારમાં આશરે ૨૦ કિલોમીટર સુધી ચલાવીને ગેરકાયદે કેનાલ ક્રોસ કરાવીને મ્યાનમાર લઇ જવાયો હતો. જ્યાં તેને સાયબર ક્રાઇમને લગતી તાલીમ લેવા માટે ફરજ પાડવામાં આવી હતી. પરંતુ, માર મારીને તેને ફરજિયાત તાલીમ આપી હતી. તેમ છતાંય, યુવકે ગેરકાયદે કામ કરવાની ના પાડતા તેને બે દિવસ ગોંધી રાખીને ભારત પરત મોકલવાના બદલામાં સાડા ત્રણ લાખની ખંડણી માંગી હતી. જે નાણાં ચુકવવામાં આવતા યુવકને ભારત પરત મોકલાયો હતો.
આ અંગે અમદાવાદ સાયબર ક્રાઇમે ગુનો નોંધીને તપાસ શરૂ કરી હતી. જેમાં અભિષેકસિંગ માટે ગુજરાતમાં કામ કરતા કેયુર શાહ નામના યુવકને વડોદરાથી ઝડપી લેવાયો હતો.
આ અંગે સાયબર ક્રાઇમના એસીપી હાર્દિક માકડીયાએ જણાવ્યું કે અભિષેકસિંગ પણ મુળ વડોદરાનો વતની છે. જે નોકરીના નામે ે બેંગકોક ગયો હતો. જ્યાંથી મ્યાનમાર અને કમ્બોડિયામાં ગેરકાયદે કોલ સેન્ટર પર કામ કર્યા બાદ તે લીડર તરીકે કામ કરીને સોશિયલ મિડીયાથી યુવકોને નોકરીના નામે બેંગકોક બોલાવીને ગેરકાયદે કોલ સેન્ટર પર કામ કરાવતો હતો. જો કોઇ ત્યાં કામ કરવાની ના પાડે તો બંધક બનાવીને તેને માનસિક યાતના આપવામાં આવે છે. જ્યારે અનેક યુવાનો નાણાં કમાવવાની લાલચમાં સ્વેચ્છાએે ગેરકાયદે કામ કરવા તૈયાર થઇ જાય છે. હાર્દિક શાહે અત્યાર સુધીમાં બે લોકોને નોકરીના નામે બેંગકોક મોકલ્યાનું પ્રાથમિક તપાસમાં સામે આવ્યું છે.
મ્યાનમાર-કમ્બોડિયા દુનિયાના ગેરકાયદે કોલ સેન્ટરના સૌથી મોટા હબ
સમગ્ર વિશ્વમાં સાયબર ક્રાઇમ આચરતી મોટાભાગની ગેંગ તેનું મુખ્ય કોલ સેન્ટર મ્યાનમાર અને કમ્બોડિયામાં ધરાવે છે. જ્યાં નોકરીના બહાને માત્ર ભારતમાંથી જ નહી પણ દુનિયાના અનેક દેશોમાંથી યુવાનોને બોલાવીને તેમને સાયબર ક્રાઇમ આચરવા માટે ફરજ પાડવામાં આવે છે. થાઇલેન્ડમાં સક્રિય ચાઇનીઝ ગેંગ યુવાનોને નદી અને જંગલ ક્રોસ કરાવીને કોલ સેેન્ટર પર લઇ જાય છે. એક અંદાજ મુજબ આ વિસ્તારમાં ચાઇનીઝ ગેંગ દ્વારા અંદાજે ૧૦૦થી વધુ કોલ સેન્ટર ચલાવવામાં આવી રહ્યા છે.
