– સાથે ચાલતી બે આઈશર પૈકી એક પલટી ગઈ, પાછળથી આવતું ટ્રેલર અન્ય આઈશરમાં અથડાયું
આણંદ : વાસદ તારાપુર હાઇવે માર્ગ ઉપર આવેલા બોરસદ તાલુકાના બોચાસણ નજીકના ઓવરબ્રીજ ઉપર બે આઇસર ટેમ્પા અને ટ્રેલર વચ્ચે સર્જાયેલા ત્રિપલ અકસ્માતમાં ટ્રેલરના ક્લીનરનું મોત થયું હતું. આ બનાવ અંગે બોરસદ ગ્રામ્ય પોલીસે અકસ્માતનો ગુનો નોધ્યો હતો.
જોધપુર ખાતે રહેતા શ્રવણ સૌરમ રામ સારણ ડ્રાઇવિંગ કરી ગુજરાન ચલાવે છે. ગત ૧૦મી ઓક્ટોબરે તેઓ કર્ણાટકથી લોખંડનો કાચો માલ ટ્રેલરમાં ભરી ક્લીનર નરેશભાઈ બાબુલાલ બિસ્નોઈને લઈ રાજકોટ જવા નીકળ્યા હતા. દરમિયાન આજે વહેલી સવારના સુમારે શ્રવણ સારણ ટ્રેલર સાથે વાસદ તારાપુર સ્ટેટ હાઇવે માર્ગ ઉપર આવેલા બોરસદ તાલુકાના બોચાસણ ગામ નજીક આવેલ ઓવરબ્રિજ ઉપરથી પસાર થઈ રહ્યા હતા. ત્યારે તેઓના ટ્રેલરની આગળ બે આઇસર ટેમ્પા એકબીજાને સમાંતર જઈ રહ્યા હતા. બંને આઇસર ટેમ્પાના ચાલકો એકબીજા સાથે વાતો કરતા હતા. ત્યારે અચાનક એક આઇસર બીજા આઇસર સાથે અથડાતા એક પલટી ખાઈ ગઈ હતી. અન્ય આઇસરના ચાલકે ત્વરિત બ્રેક મારતા પાછળ આવી રહેલા ટ્રેલરના ચાલકે અકસ્માતથી બચવા શોર્ટ બ્રેક મારી હતી પરંતુ ટ્રેલર કંટ્રોલ ન થતા આગળ જઈ રહેલા આઇસર ટેમ્પાની પાછળના ભાગે અથડાયું હતું. અકસ્માતમાં ટ્રેલરમાં સવાર ક્લીનર નરેશભાઈ બાબુલાલ બિશ્નોઈને શરીરે ગંભીર ઇજાઓ પહોંચતા તેનું ઘટના સ્થળે જ મોત થયું હતું. આ બનાવ અંગે બોરસદ ગ્રામ્ય પોલીસે અકસ્માત સર્જનારા આઇસર ટેમ્પાના ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી હતી.
