Vadodara Corporation : વડોદરા ભાજપ દ્વારા સ્વર્ગસ્થ અટલ બિહારી વાજપેયીના જન્મદિનની ઉજવણીના ભાગરૂપે આજે વોર્ડ નંબર 16માં સફાઈ ઝુંબેશ કાર્યક્રમ યોજવામાં આવ્યો હતો. તે સમયે ભાજપના પૂર્વ મહિલા કોર્પોરેટર દ્વારા ઉપસ્થિત રહેલા કાર્યકર્તાઓ સમક્ષ કોર્પોરેટરો કે અધિકારીઓ પૂર્વ કોર્પોરેટરના કામો કરતા નથી ત્યાં લોકોની તો હાલત શું હશે. તેમ કહી આક્રોશ વ્યક્ત કર્યો હતો.
વડોદરા ભાજપ દ્વારા વિવિધ વોર્ડમાં સ્વર્ગસ્થ અટલ બિહારી વાજપેયીના જન્મદિનની ઉજવણી કરવા માટે આપેલી સૂચના મુજબ આજે વોર્ડ કક્ષાએ અલગ અલગ વિસ્તારોમાં વિવિધ કાર્યક્રમોનું આયોજન કરવામાં આવ્યું હતું જેના ભાગરૂપે આજે સવારે વોર્ડ નંબર 16માં મહેતાવાડી વિસ્તારમાં સફાઈ ઝુંબેશનો કાર્યક્રમ રાખવામાં આવ્યો હતો. જેમાં વોર્ડના કાર્યકર્તાઓ, કોર્પોરેટરો તેમજ પૂર્વ કોર્પોરેટરો ઉપસ્થિત રહ્યા હતા.
મહેતા વાડીમાં આવેલી આંગણવાડીમાં કાર્યક્રમ યોજાયા બાદ ખુલ્લા મેદાનમાં પડેલી ગંદકીની સફાઈ ભાજપના કાર્યકર્તાઓ કોર્પોરેટરોએ હાથ ધરી હતી. તે દરમિયાન નજીકમાં જ રહેતા અગાઉ અપક્ષ તરીકે ચૂંટાયેલા અને ત્યારબાદ ભાજપમાં જોડાયા બાદ ભાજપની પેનલમાંથી ચૂંટણી લડેલા પૂર્વ મહિલા કોર્પોરેટર ચૂંટણી લડેલા પૂર્વ મહિલા કોર્પોરેટરએ આક્રોશ વ્યક્ત કર્યો હતો જેથી કાર્યકર્તાઓમાં ચર્ચાનો વિષય બન્યો હતો.
ભાજપના મહિલા કોર્પોરેટરે આક્રોશ વ્યક્ત કરતા જણાવ્યું હતું કે ભાજપના કોઈ કોર્પોરેટર આ વિસ્તારમાં દેખાતા નથી લોકોના પ્રશ્નો તો શું પરંતુ અમે પૂર્વ કોર્પોરેટર છીએ અને ફરિયાદ કરીએ તો તેનો કોઈ નિકાલ લાવવામાં આવતો નથી અધિકારીઓ કે કોર્પોરેટર લોકોના કામ કરતા નથી ત્યારે અમારે કોંગ્રેસના વિપક્ષના નેતાને આ વિસ્તારમાં બોલાવવાની ફરજ પડે છે અને તેઓને બોલાવીએ છીએ ત્યારે હંમેશા અમારા પ્રશ્નોનો નિકાલ કરે છે.
