વડોદરાઃ વડોદરા જિલ્લાના સહકારી વિભાગમાં ભાજપમાં આંતરિક જૂથબંધી બહાર આવ્યા બાદ હવે ત્રણ સંસ્થાઓના પ્રમુખ-ઉપપ્રમુખની ચૂંટણી ઘોંચમાં પડતાં ચર્ચાનો વિષય બન્યો છે.
વડોદરા જિલ્લાની પાદરા એપીએમસીમાં ભાજપે તમામ ૧૦ બેઠક ગુમાવી હતી અને ભાજપના જ બળવાખોર જૂથનો વિજય થયો હતો. ભાજપના દિનુમામાના બળવાખોર જૂથે મેન્ડેટ આપવામાં મનમાની ચલાવવામાં આવી રહી હોવાનો આક્ષેપ પણ કર્યો હતો,પરંતુ મેન્ડેટ આપવામાં વર્તમાન ધારાસભ્ય ચૈતન્યસિંહ ઝાલાનો હાથ ઉપર રહ્યો હતો અને આખરે ભાજપે સત્તા ગુમાવી હતી.આ ચૂંટણીના પરિણામ જાહેર થયાને બે મહિનાથી વધુ સમય થયો હોવા છતાં હજી પ્રમુખ-ઉપપ્રમુખની ચૂંટણી જાહેર કરાતી નથી.
આવી જ રીતે ડભોઇ એપીએમસીમાં ભાજપે પહેલીવાર બહુમતી મેળવી છે.પરંતુ સામે વિરોધ પક્ષના ચાર સભ્યો પણ વિજેતા બન્યા છે.ભાજપ પાસે બહુમતી હોવા છતાં અને પરિણામો જાહેર થયાને દોઢ મહિનો થઇ ગયો હોવા છતાં હજી પ્રમુખ-ઉપપ્રમુખની ચૂંટણી કેમ જાહેર નથી કરાતી તે સવાલ છે.
તો બીજીતરફ વડોદરા જિલ્લા સહકારી ખરીદ વેચાણ સંઘમાં પણ ભાજપે બહુમતી મેળવી હતી.આ ચૂંટણીમાં ભાજપે જૂની તારીખ નાંખેલા મેન્ડેટ પછીથી આપતાં વિવાદ સર્જાયો હતો.ભાજપે બિનહરીફ વિજેતા થયા હોય તેવાને મેન્ડેટમાં સમાવી લીધા હોવાનો પણ આક્ષેપ થયો હતો.સંઘની ચૂંટણીને પણ એક મહિનાથી વધુ સમય થયોહોવા છતાં હજી ચૂંટણી શા માટે જાહેર નથી કરાતી તે ચર્ચાનો વિષય છે.
શિનોર અને કરજણ APMC ના પ્રમુખની અઢીવર્ષની પહેલી ટર્મ પણ પુરી
વડોદરા જિલ્લાની શિનોર અને કરજણ એપીએમસીમાં પણ પ્રમુખની અઢી વર્ષની બીજી ટર્મ માટેની ચૂંટણીની જાહેરાત થઇ નથી.
શિનોર અને કરજણ એપીએમસી ભાજપ હસ્તક છે તેમજ બંને એપીએમસીમાં પ્રમુખ-ઉપપ્રમુખની અઢી વર્ષની પહેલી ટર્મ દસેક દિવસ પહેલાં જ પુરી થઇ ગઇ છે.પરંતુ તેમ છતાં અઢી વર્ષની બીજી ટર્મ માટે ચૂંટણીની જાહેરાત કરવામાં આવી નથી.
નોંધનીય છે કે,ઉપરોક્ત બંને તાલુકામાં ભાજપમાં કોંગ્રેસ છોડીને આવેલા ભાજપના વર્તમાન ધારાસભ્ય અને ભાજપના પૂર્વ ધારાસભ્યના ગુ્રપ વચ્ચે લાંબા સમયથી જૂથબંધી ચાલતી હોવાથી તેના પ્રત્યાઘાત ઉપરોક્ત ચૂંટણીમાં પડે તેવી દહેશત વર્તાઇ રહી છે.અમૂલમાં પણ પરિણામ જાહેર થયાના ત્રણ મહિના પછી ચેરમેનની ચૂંટણી જાહેર થઇ હતી.
ભાજપની જૂથબંધી ખુલ્લી ના પડે તે માટે ચૂંટણીઓ જાહેર કરવામાં ખચકાટ
વડોદરા જિલ્લાની સહકારી સંસ્થાઓમાં ચૂંટણીઓ જાહેર નહિ કરવા પાછળનું કારણ શું છે તે મુદ્દે કાર્યકરોમાં અનેક પ્રકારની ચર્ચા થઇ રહી છે.
પ્રાપ્ત વિગતો મુજબ,સહકારી ક્ષેત્રની ચૂંટણીઓ જાહેર કરવામાં ભાજપના મોવડીઓ ખચકાટ અનુભવી રહ્યા હોવાનું મુખ્ય કારણ જૂથબંધીનું ચર્ચાઇ રહ્યું છે.જેમાં સ્થાનિક સ્વરાજની ચૂંટણીઓ નજીક આવી રહી હોવાથી ઉપરોક્ત ચૂંટણીઓની જૂથબંધીના પડઘા સ્થાનિક સ્વરાજની ચૂંટણીઓમાં પડે તેવી દહેશત જોવાઇ રહી છે.
આવી જ રીતે બીજું એક કારણ જિલ્લા સંગઠનની રચનાનું ચર્ચાના કેન્દ્રમાં છે.જિલ્લા સંગઠનના પ્રમુખ તરીકે રસિકભાઇ પ્રજાપતિની નિયુક્તિથી અનેક સિનિયર આગેવાનો ચોંક્યા હતા.પરંતુ ત્યારપછી આઠ મહિના થવા છતાં હજી સંગઠનની રચના થઇ નથી.જેથી નવી રચના થયા બાદ સહકારી વિભાગોમાં પ્રમુખોની ચૂંટણી થાય તેમ જણાય છે.
બરોડા સેન્ટ્રલ બેન્ક અને બરોડા ડેરીના ડિરેક્ટરોની પણ ટર્મ પુરી થઇગઇ
વડોદરા જિલ્લાની સહકારી ક્ષેત્રની બે મહત્વની સંસ્થા બરોડા ડેરી અને બરોડા સેન્ટ્રલ બેન્કની ટર્મ પણ હાલમાં જ પુરી થઇ છે.પરંતુ ચૂંટણીના કોઇ અણસાર નથી.
જિલ્લાની સૌથી મોટી સહકારી બેન્ક બરોડા સેન્ટ્રલ બેન્કના ડિરેક્ટરોની પાંચ વર્ષની ટર્મ ગઇ તા.૧૦ ડિસેમ્બરે પુરી થઇ ગઇ છે.જ્યારે,બરોડા ડેરીની ટર્મ બે દિવસ પહેલાં તા.૨૮મી ડિસેમ્બરે પુરી થઇ છે.
નોંધપાત્ર બાબત એ છે કે,સામાન્ય રીતે ઉપરોક્ત સંસ્થાઓની ચૂંટણીઓ ટર્મ પુરી થવાના એક મહિના પહેલાં થઇ જતી હોય છે.પરંતુ બંને સંસ્થાઓની ટર્મ પુરી થઇ ગઇ હોવા છતાં હજી ચૂંટણી જાહેર કરાઇ નથી.
