કોટંબી સ્થિત બરોડા ક્રિકેટ એસોસિએશન (બીસીએ) સ્ટેડિયમ ખાતે આગામી તા. ૧૧જાન્યુઆરીના રોજ યોજાનારી આંતરરાષ્ટ્રીય ભારત -ન્યૂઝીલેન્ડ વનડે ક્રિકેટ મેચને ધ્યાનમાં રાખી સુરક્ષા અને વ્યવસ્થાના ભાગરૂપે આજે વડોદરા ગ્રામ્ય જિલ્લા પોલીસ વડા સુશીલ અગ્રવાલે સ્ટેડિયમની મુલાકાત લઈવિસ્તૃત નિરીક્ષણ કર્યું હતું. આ દરમિયાન તેમણે બીસીએના હોદેદારો સાથે સુરક્ષા, ટ્રાફિક અને પાર્કિંગ વ્યવસ્થા અંગે જરૂરી ચર્ચા કરી હતી.
પોલીસ વડાએ સ્ટેડિયમમાં પ્રેક્ષકોને સરળતાથી પ્રવેશ મળે તેમજ કોઈ અડચણ વિના મેચ નિહાળી શકે તે માટે જરૂરી આયોજન કરવા સૂચના આપી હતી. હાઈવે પરથી સ્ટેડિયમ સુધી પહોંચવા દરમિયાન વાહનવ્યવહારને લઈ સંભવિત ટ્રાફિક જામ કે અકસ્માત ન સર્જાય તે માટે વિશેષ તકેદારી રાખવા પર ભાર મુકાયો હતો.આ નિરીક્ષણ દરમિયાન ડી.વાય.એસ.પી. આકાશ પટેલ, એલસીબી, એસઓજી, ટ્રાફિક વિભાગના અધિકારીઓ, જરોદ પોલીસ સ્ટેશનનો સ્ટાફ તેમજ બીસીએના સીઈઓ સ્નેહલ પરીખ, ટ્રેઝરર શીતલ મહેતા, પૂર્વ ક્રિકેટર અતુલ બેદાડેસહિતના આગેવાનો ઉપસ્થિત રહ્યા હતા.
સ્ટેડિયમતરફ આવવા-જવા માટે હાઈવે પર ટ્રાફિક વ્યવસ્થાને સુગમ બનાવવા માટે વિવિધ વિકલ્પો પર ચર્ચા કરવામાં આવી હતી. જેમાં રોડ ડાયવર્ઝન આપવું, નિશ્ચિત સમય માટે એક બાજુના સર્વિસ રોડનો ઉપયોગ કરવો સહિતના વિચારો પર વિચારણા ચાલી રહી છે. મળતી માહિતી મુજબ, સ્ટેડિયમ પાસે નવા બનેલા આર.સી.સી. રોડ નજીક હાઈવેના ડિવાઇડર તોડી અગાઉની જેમ પ્રવેશ આપવામાં આવશે અને મેચ પુરી થયા બાદ બીસીએ દ્વારા ડિવાઇડર ફરી બનાવવામાં આવશે.
ગ્રાઉન્ડ અને ફર્સ્ટ રોની વચ્ચે ફેન્સીંગ લગાવાશે
સ્ટેડિયમ ખાતે બે ગ્રાઉન્ડ અને ત્રણ ખેતર મળી અંદાજે ૧૦ લાખ ચોરસ ફૂટ વિસ્તારમાં પાર્કિંગની વ્યવસ્થા ઉભી કરવામાં આવી છે. પ્રેક્ષકોની સુરક્ષા હેતુ ગ્રાઉન્ડ અને ફર્સ્ટ રોની વચ્ચે ફેન્સીંગ લગાવવાની સૂચના પોલીસ દ્વારા આપવામાં આવી હતી, જેના સેમ્પલનું આજે નિરીક્ષણ કરવામાં આવ્યું હતું. ઉપરાંત કંટ્રોલ રૂમ અનેબે વોચ ટાવર માટે સ્થળ નિરીક્ષણ પણ કરવામાં આવ્યું હતું. પાર્કિંગ તરફ પ્રેક્ષકોની સરળ અવરજવર સુનિશ્ચિત કરવા તેમજ હાઈવે પર વાહનો પાર્ક ન થાય તે માટે સર્વિસ રોડ ખાલી રાખવાની ખાસ કાળજી રાખવામાં આવશે.
