વડોદરા, તા.30 કરજણ તાલુકાના એક્સપ્રેસ હાઇવે પરથી દારૃ ભરેલી ટેન્કર અને રૃા.૧૫ લાખના તોડકાંડમાં ઝડપાયેલા સ્ટેટ વિજિલન્સના સસ્પેન્ડેડ કોન્સ્ટેબલ સાજણ આહિરને આજે કોર્ટમાં રજૂ કરી જિલ્લા પોલીસે વધુ ત્રણ દિવસના રિમાન્ડ મેળવ્યા હતાં.
પ્રાપ્ત માહિતી મુજબ દારૃનો જથ્થો ભરેલું ટેન્કર પોલીસ ના ઝડપે તે માટે રાજસ્થાનના ગેંગસ્ટર અનિલ ઉર્ફે પાંડીયા પાસે આંગડીયા મારફતે રૃા.૧૫ લાખ મંગાવ્યા હતાં. આ સમગ્ર વિગતો બહાર આવતા આખરે સ્ટેટ વિજિલન્સે સાજણ આહિરને સસ્પેન્ડ કરી તેની અટકાયત કરીને વડોદરા જિલ્લા પોલીસને સોંપ્યો હતો અને પોલીસે તેના રિમાન્ડ મેળવ્યા હતાં. આજે રિમાન્ડ પૂરા થતાં ફરી કોર્ટમાં રજૂ કરી ત્રણ દિવસના રિમાન્ડ વધુ તપાસ માટે મેળવ્યા છે.
બીજી બાજુ સાજણ આહિરના મોબાઇલનો હજી પત્તો નથી. પોલીસને સાજણે એવી વાત કહી છે કે હું પત્ની સાથે વાત કરતો હતો ત્યારે મોબાઇલ પડી ગયો હતો જે મળતો નથી. જો સાજણ મોબાઇલ ના આપી શકે તો તેની સામે પુરાવાનો નાશ કરવાના ગુનાનો પણ ઉમેરો થઇ શકે છે. જ્યારે સાજણ આહિરની મિલકતોની તપાસ માટે જિલ્લા પોલીસ દ્વારા એસીબી ગાંધીનગરને પત્ર લખવામાં આવ્યો છે.
ગુજસીટોકના ગુનામાં તેમજ કરજણ પોલીસ સ્ટેશનના પ્રોહિબિશનના ગુનામાં વોન્ટેડ રાજસ્થાનના ગેંગસ્ટર અનિલ ઉર્ફે પાંડીયાની સ્ટેટ મોનિટરિંગ સેલ તેમજ રાજ્યની અન્ય પોલીસ પકડી શકી નથી. પ્રાથમિક તપાસમાં તે વિદેશ હોવાની આશંકા હોવાથી પોલીસ દ્વારા અન્ય કાર્યવાહી પણ હાથ ધરવામાં આવી હોવાનું જાણવા મળ્યું છે.
