Gujarat Weather Update: અમદાવાદ જિલ્લાના ગ્રામ્ય વિસ્તારોમાં લાંબા સમયના અસહ્ય બફારા બાદ સમી સાંજે વાતાવરણમાં અચાનક પલટો આવ્યો છે. બાવળા તાલુકા સહિત આસપાસના પંથકમાં આકાશ કાળાડિબાંગ વાદળોથી ઘેરાઈ ગયું હતું અને મેહુલિયાએ અમી છાંટણા કરીને જાણે ચોમાસાની સિઝનની શરૂઆત કરી હતી. આ બદલાયેલા હવામાનને કારણે સ્થાનિક લોકોને અસહ્ય ગરમીમાંથી મોટી રાહત મળી છે અને સમગ્ર પંથકમાં ઠંડક પ્રસરી ગઈ છે.
ખેડૂતો હાલ આગોતરી ખેતીના કામોમાં જોતરાયા
બીજી તરફ, બગોદરામાં વીજળીના કડાકા-ભડાકા સાથે ધોધમાર વરસાદ થયો છે. સિઝનના આ પહેલા ધીમીધારે શરૂ થયેલા વરસાદને કારણે ધરતીપુત્રોમાં ભારે આનંદની લાગણી છવાઈ ગઈ છે. આ સાથે જ ધોલેરા પંથકમાં પણ મેઘમહેર થતાં વાતાવરણ આહલાદક બની ગયું છે. વરસાદના આગમનની સાથે જ ખેડૂતો હવે આગોતરી ખેતીના કામોમાં જોતરાઈ ગયા છે.
મકરબા-સરખેજ વિસ્તારમાં પડ્યું વરસાદી ઝાપટું
અમદાવાદ શહેરમાં પણ રાત્રે 9:30 વાગ્યા આસપાસ વાતાવરણમાં અચાનક પલટો આવ્યો છે, જેના પગલે એસ.જી. હાઈવે, મકરબા અને સરખેજ સહિતના આસપાસના વિસ્તારોમાં જોરદાર વરસાદી ઝાપટું પડ્યું હતું. આ અણધાર્યા વરસાદના કારણે કાળઝાળ ગરમી અને બફારાથી હેરાન થતા સ્થાનિક લોકોને મોટી રાહત મળી છે.
ગોધરામાં વરસાદી માહોલ
પંચમહાલના ગોધરા પંથકમાં આખા દિવસના અસહ્ય ઉકળાટ અને વાદળછાયા વાતાવરણ બાદ મેઘરાજાની એન્ટ્રી થઈ છે. અચાનક ફૂંકાયેલા જોરદાર પવનને કારણે મિનિ વાવાઝોડા જેવી સ્થિતિ સર્જાઈ હતી, ગોધરાના ભુરાવાવ, વાવડી, ગોવિંદી અને બમરોલી સહિતના ગ્રામ્ય વિસ્તારોમાં મેઘ મહેર થઈ છે.પંચમહાલના ગોધરા પંથકમાં આખા દિવસના અસહ્ય ઉકળાટ અને વાદળછાયા વાતાવરણ બાદ મેઘરાજાની એન્ટ્રી થઈ છે. અચાનક ફૂંકાયેલા જોરદાર પવનને કારણે મિનિ વાવાઝોડા જેવી સ્થિતિ સર્જાઈ હતી, ગોધરાના ભુરાવાવ, વાવડી, ગોવિંદી અને બમરોલી સહિતના ગ્રામ્ય વિસ્તારોમાં મેઘ મહેર થઈ છે.
નૈઋત્યનું ચોમાસું સ્લો-મોશનમાં આવી ગયું
હવામાન વિભાગ મુજબ પશ્ચિમના દરિયાકાંઠે 8 જૂનથી જ નૈઋત્યનું ચોમાસું સ્લો-મોશનમાં આવી ગયું છે. બંગાળની ખાડીમાં કોઈ મજબૂત ડિપ્રેશન(વરસાદી સિસ્ટમ) ન સક્રિય થવાને કારણે ચોમાસાની પ્રગતિ અટકી ગઈ છે, જેને લીધે ચાલુ વર્ષે વરસાદ માટે હજુ વધુ થોડા દિવસો રાહ જોવી પડે તેવી સ્થિતિ સર્જાઈ છે.
ભદ્રાચલમમાં અટકેલી સિસ્ટમ, મુંબઈમાં પણ વિલંબ
હવામાન વિભાગના જણાવ્યા અનુસાર, છેલ્લા છ દિવસથી ચોમાસું તેલંગાણાના ભદ્રાચલમ વિસ્તારમાં સ્થિર થઈ ગયું છે. આગામી એક સપ્તાહ સુધી નવી કોઈ મજબૂત સિસ્ટમ બને તેવા સંકેતો નથી. આ ધીમી ગતિના કારણે મુંબઈ સુધી ચોમાસું પહોંચતા હજુ 7થી 8 દિવસ જેટલો સમય લાગી શકે છે. જોકે, આગામી 4થી 5 દિવસમાં તેલંગાણા, ઓડિશા, ઝારખંડ, બિહાર અને છત્તીસગઢના કેટલાક વિસ્તારોમાં ચોમાસું ધીમે-ધીમે આગળ વધે તેવી સાનુકૂળ શક્યતાઓ સેવાઈ રહી છે. ચોમાસાની આ ધીમી ચાલના કારણે દેશના 723 જિલ્લાઓમાંથી અત્યાર સુધી માત્ર 103 જિલ્લામાં જ સામાન્ય વરસાદ નોંધાયો છે.
ગુજરાતમાં ક્યારે થશે એન્ટ્રી? અમદાવાદમાં ઉકળાટ
ગુજરાતના આર્થિક પાટનગર ગણાતા અમદાવાદ સુધી ચોમાસાની સત્તાવાર એન્ટ્રી થવામાં હજુ સમય લાગી શકે છે. હાલ અમદાવાદમાં વાદળછાયું વાતાવરણ તો જોવા મળી રહ્યું છે, પરંતુ તેના કારણે ગરમીમાં રાહત મળવાને બદલે અસહ્ય ઉકળાટ વધી ગયો છે. શહેરમાં ગરમીનો પારો 40 ડિગ્રીને પાર પહોંચી ગયો છે, જેનાથી નાગરિકો ત્રાહિમામ પોકારી ઉઠ્યા છે.
આગામી 2 દિવસ હળવા વરસાદની આગાહી
ચોમાસું ભલે મોડું હોય, પરંતુ સ્થાનીય સિસ્ટમ સક્રિય થવાના કારણે રાજ્યના કેટલાક ભાગોમાં આજથી બે દિવસ પ્રી-મોન્સૂન એક્ટિવિટીના ભાગરૂપે હળવાથી મધ્યમ વરસાદી ઝાપટાં પડી શકે છે.
દક્ષિણ ગુજરાત: સુરત, વાપી, વલસાડ, ડાંગ, દમણ અને દાદરા નગર હવેલીમાં હળવા વરસાદની સંભાવના છે.
ઉત્તર ગુજરાત: બનાસકાંઠા અને સાબરકાંઠા જિલ્લામાં પણ સિસ્ટમ સક્રિય થતાં સામાન્ય વરસાદી માહોલ જોવા મળી શકે છે.
બીજી તરફ, આવતીકાલ ગુરુવારથી દેશના ઉત્તર-પશ્ચિમ ભાગોમાં વેસ્ટર્ન ડિસ્ટર્બન્સની અસર જોવા મળશે, જેના કારણે પશ્ચિમી હિમાલયના વિસ્તારોમાં ભારે વરસાદ અને મેદાની ભાગોમાં વાવાઝોડા સાથે વીજળી પડવાની આશંકા છે. આ ઉપરાંત પાકિસ્તાન અને રાજસ્થાન સરહદ પર એક નવી વરસાદી સિસ્ટમ સક્રિય થઈ હોવાનો દાવો પણ કરાયો છે.
