મુંબઈ : દેશના અનેક ભાગોમાં મે મહિનાના બીજા પખવાડિયાથી ચોમાસા જેવો માહોલ બની જતા અને જોરદાર વરસાદ પડવા ઉપરાંત વર્તમાન વર્ષનું ચોમાસુ લગભગ એક સપ્તાહ વહેલુ બેસી જતા ફાસ્ટ મુવિંગ કન્ઝયૂમર ગુડસ (એફએમસીજી) તથા એર કન્ડીશન (એસી)ના વેચાણ પર અસર જોવા મળી રહી હોવાનું જાણવા મળી રહ્યું છે.
ઠંડા પીણાં, આઈસ ક્રીમ્સ, એસી જેવા પ્રોડકટસનું ઉનાળામાં ખાસ કરીને એપ્રિલથી જૂન દરમિયાન વેચાણ ઊંચુ રહેતુ હોય છે, પરંતુ વર્તમાન વર્ષમાં દેશના અનેક ભાગોમો મેના મધ્યમથી જ અનેક વિસ્તારો વરસાદ પડવાનું શરૂ થતાં ઠંડા પીણાં, આઈસ ક્રીમ તથા એસીની માગ મંદ પડી રહી હોવાનું એફએમસીજી ક્ષેત્રના એક એનાલિસ્ટે જણાવ્યું હતું.
વર્તમાન વર્ષમાં ફેબુ્રઆરીથી જ અનેક ભાગોમાં તાપમાન ઊંચુ જોવા મળી રહ્યું હતું જેને પરિણામે એસીના વેચાણ વોલ્યુમમાં વધારો થયો હતો, પરંતુ મેમાં શરૂ થયેલા વરસાદે વેચાણને બ્રેક મારી છે.
દેશના દક્ષિણ, પશ્ચિમ તથા પૂર્વ વિસ્તારમાં એફએમસીજી વેચાણમાં વર્તમાન મહિનામાં ૨૨થી ૨૫ ટકા ઘટાડો જોવા મળી રહ્યો છે. વર્તમાન વર્ષમાં ચોમાસુ કેરળમાં ૨૭મી મેમાં બેસી જવાની હવામાન વિભાગે આગાહી કરી છે જે ૧લી જૂનની સામાન્ય તારીખથી થોડુક વહેલુ છે.
મુંબઈ, બેંગ્લુરુ, અમદાવાદ, ચેન્નાઈ તથા દિલ્હી સહિત અનેક શહેરોમાં ચોમાસા પહેલા જોરદાર વરસાદ પડયો છે.
આ વર્ષે ફેબુ્રઆરીથી જ ગરમી વધી જતા ઠંડા પીણાંના વેચાણની દ્રષ્ટિએ ૨૦૨૫નો પ્રથમ ત્રિમાસિક ગાળો પ્રોત્સાહક રહ્યો હોવાનું ઠંડા પીણાંના એક ડીલરે જણાવ્યું હતું. ઠંડા પીણાં ઉપરાંત બોટલમાં વેચાતા પાણીની માગ પર પણ અસર જોવા મળી છે.
હવે ચોમાસુ નજીક આવી રહ્યું છે અને મેના બાકીના સમયમાં તાપમાન ઊંચુ જવાની શકયતા જણાતી નહીં હોવાથી એફએમસીજી તથા એસી ઉત્પાદકો માટે સમર સેલ લગભગ પૂરું થઈ ગયાનું માનવામાં આવે છે.
