અમદાવાદ : આંતરરાષ્ટ્રીય યોગ દિવસ દર વર્ષે ૨૧ જૂને ઉજવવામાં આવે છે. આ પ્રસંગે, સમગ્ર વિશ્વ યોગની પ્રાચીન પરંપરા અને તેના આધુનિક સ્વરૂપની ઉજવણી કરે છે. યોગ હવે ફક્ત મેટ પર આસનો કરવા અને સ્વસ્થ રહેવા પૂરતો મર્યાદિત નથી, પરંતુ તે એક ખૂબ જ મોટો ઉદ્યોગ બની ગયો છે, જ્યાં કરોડો રૂપિયાનો વ્યવસાય ચાલી રહ્યો છે.
લોકો હવે પહેલા કરતાં તેમના સ્વાસ્થ્ય અને માનસિક શાંતિને વધુ મહત્વ આપી રહ્યા છે અને તેના માટે ઘણા પૈસા પણ ખર્ચી રહ્યા છે. ઓનલાઈન યોગ વર્ગોએ દરેક માટે તેને સરળ બનાવ્યું છે. યોગ ફક્ત શારીરિક તંદુરસ્તી નથી, પરંતુ લોકોને એકબીજા સાથે જોડે છે.
ઇક્વેન્ટિસ ડોટ કોમના એક અહેવાલ મુજબ, ૨૦૨૭ સુધીમાં યોગ ૬૬.૨ બિલિયન ડોલરનો ઉદ્યોગ બનશે, જે વધુ ઝડપથી વિકાસ પામશે તેવી અપેક્ષા છે. યોગ વધુને વધુ લોકપ્રિય થઈ રહ્યો છે, તેથી તેનાથી સંબંધિત સ્ટાર્ટઅપ્સ પણ ઝડપથી ઉભરી રહ્યા છે. એક અહેવાલ મુજબ, ભારતમાં વેલનેસ માર્કેટ રૂ. ૪૯૦ અબજનું છે, જેમાંથી યોગ સ્ટુડિયો અને ફિટનેસ સેન્ટરો ૪૦% હિસ્સો ધરાવે છે. આગામી ત્રણ વર્ષમાં, આ બજાર ૨૦% ના દરે વધીને રૂ. ૮૭૫ અબજ સુધી પહોંચવાની અપેક્ષા છે. લોકો હવે રોગોથી બચવા માટે યોગ અપનાવી રહ્યા છે, જે આ બજારના વિકાસનું એક મુખ્ય કારણ છે.
ઓનલાઇન પ્લેટફોર્મ, એપ્લિકેશન્સ અને ટેકનોલોજીએ યોગને તમામ ઉંમરના અને ક્ષમતાઓના લોકો માટે સુલભ બનાવ્યો છે.
યોગની દુનિયામાં ૧૮ સ્ટાર્ટઅપ્સની બોલબાલા છે. આ સ્ટાર્ટઅપ્સ દેશ અને દુનિયાભરમાં યોગ સંબંધિત કાર્ય કરી રહ્યા છે.આ સ્ટાર્ટઅપ્સમાં ઇવોલેશન, ટમીડોટકોમ, BWT એક્સપિરિયન્સ, મોમેન્ટમ કલેક્ટિવ, આર્ટ ઓફ લિવિંગ ડિજિટલ, યોગંતા, જુરુ મેટ્સ, ડ્રન્ક યોગા, આયુ ર્યુનિવર્સ, ફિટમી, વેલેનેસિસ યોગીફાઇ, યોગા જલ, હીટવાઈઝ, સુનાના, સર્વ ઓનલાઇન યોગ, યોગા બાર્સ, ફોરએવર યોગા અને અક્ષર પાવર યોગાનો સમાવેશ થાય છે.આ તમામ સ્ટાર્ટઅપ્સ તાલીમ, વર્કશોપ, સાધનો અને સંસાધનો, સંગીત, કલા, મેટ ઉત્પાદન, લેખો અને નિષ્ણાત તાલીમ તથા આરોગ્યવર્ધક પીણાં અને અન્ય ઉત્પાદનો સહિત અન્ય સેવા પૂરી પાડે છે.
