રક્ષાબંધને પિયર જવા બાબતેનો ઝઘડો કારણભૂત : હોમગાર્ડ જવાનની પત્નીને માથા અને હાથના પોચામાં ઈજા : ગાંધીગ્રામ-2 પોલીસ મથકમાં ફરિયાદ
રાજકોટ, : ભાઈને રાખડી બાંધવા પિયર જવાની વાત કરનાર પરિણીતા સાથે સસરાએ ઝઘડો કરી, તેના માથામાં હથોડો ઝીંકી દીધો હતો. એટલું જ નહીં ડાબા હાથનો પોચો ભાંગી નાંખ્યો હતો. ગાંધીગ્રામ-2 પોલીસે ગુનો નોંધી તપાસ હાથ ધરી છે. ઘંટેશ્વર પાર્ક પાછળ બ્રહ્માનંદ સોસાયટીમાં રહેતી પુજાબેન રાજયગુરૂ (ઉ.વ. 26)નો પતિ બંશી ગાંધીગ્રામ પોલીસ મથકમાં હોમગાર્ડ તરીકે ફરજ બજાવે છે. તેણે પોલીસને જણાવ્યું કે અવાર-નવાર તેની સાથે ઘરકામ બાબતે ઝઘડો કરતા હતા. તે ઘરે ઈમિટેશનનું કામ કરે છે. 2023માં તેને ઝેરી જનાવર કરડી જતાં અને જામનગર રહેતાં તેના ભાઈ વાસુદેવ ત્રિવેદીની તબીયત સારી નહીં રહેતાં પતિની મંજૂરી લઈ પિયર જવા માટે વાત કરતાં સસરાએ ના પાડી, ગડદાપાટુનો માર મારી, તમાચા ઝીંકી દીધા હતા. જોકે બાદમાં તેનો પતિ તેને પિયર લઈ ગયો હતો.
અવાર-નવાર સસરા કહેતા કે મારા ઘરમાં તારા ઘરના કોઈ સભ્યએ આવવુ નહીં કે જવું નહીં. એકવાર આ મુદ્દે મારકૂટ કરતાં સાસુ દિપાબેન વચ્ચે પડતા તેને પણ મારકુટ કરી હતી. ગઈકાલે રાત્રે દસેક વાગ્યે તેનો પતિ નોકરીએ જતો રહ્યો હતો. તેની નણંદ ગેમલ વ્યાસ ઉપલેટા રહે છે. જેથી તેણે પતિ સાથે રક્ષાબંધનના દિવસે નણંદના ઘરે ગયા બાદ ત્યાંથી જામનગર માવતરને ત્યાં જવાનું નકકી કર્યું હતું. આ વાત સસરાને કરતાં તેણે સ્પષ્ટ કહ્યું કે તારે ઉપલેટા જવાનું નથી, તું સીધી તારા પિયર જતી રહેજે. તેને ઉપલેટા કયા કારણથી ના જાઉ તેમ પૂછતાં એકદમ ઉશ્કેરાઈ જઈ ગડદાપાટુનો માર માર્યા બાદ પાછળથી માથામાં હથોડાનો ઘા ઝીંકી દીધો હતો. જેને કારણે માથુ ફૂટી ગયું હતું. બીજો ઘા મારવા જતા તેણે ડાબા હાથ વડે હથોડો પકડી લેતાં પોચા પર ઘા વાગ્યો હતો. આ વખતે સાસુ દિપાબેને વચ્ચે પડી તેને વધુ મારથી બચાવી હતી. જાણ થતા પતિ ઘરે આવી પોતાની કારમાં સિવીલ લઈ ગયો હતો. જયાં ડાબા હાથે પોચાના ભાગે ફેકચર હોવાનું તબીબે જણાવ્યું હતું.
