અમદાવાદ,શુક્રવાર
અમેરિકા, લંડનના બદલે યુરોપિયન દેશના વિઝા અપાવીને ત્યાં થોડા મહિના કામ કરીને લાખોની કમાણી કરી અપાવવાનું કહીને લક્ઝમબર્ગ સહિતના દેશોના બોગસ વિઝા આપીને કરોડોની છેતરપિંડી આચરતી ગેંગના ત્રણ સાગરિતોની ેએટીએસ દ્વારા ધરપકડ કરીને કાર્યવાહી કરવામાં આવી છે. જેમાં તેમણે ૪૦થી વધુ લોકો સાથે વિઝા નામે ઠગાઇ કરીને ત્રણ કરોડ ઉપરાંતની છેતરપિંડી આચરી હોવાનું સામે આવ્યું છે.
ગુજરાત એટીએસના અધિકારીઓને ચોક્કસ બાતમી મળી હતી કે ગાંધીનગર અને અમદાવાદમાં રહેતા કેટલાંક વ્યક્તિઓ લક્ઝમબર્ગ સહિતના યુરોપિયન દેશોના બિઝનેસ વિઝાના નામે બનાવટી વિઝા અપાવીને મોટા પ્રમાણમાં કૌભાંડ ચલાવી રહ્યા છે. જેના આધારે એક ટીમ બનાવીને મયંક ભારદ્વાજ (રહે. સીમરાજ સ્ટેટસ, કુડાસણ), તેજેન્દ્ર ગજ્જર (રહે.ગૌરીપુજા સોસાયટી, નવા વાડજ) અને મનીષ પટેલની અટકાયત કરીને પુછપરછ કરી હતી. જેમાં જાણવા મળ્યુ હતું કે તેમણે મહેસાણા , અમદાવાદ અને ગાંધીનગરમાં રહેતા છ જેટલા લોકોને લક્ઝમબર્ગ સહિતના દેશના વિઝા અપાવવાના નામે ૭૦ લાખ જેટલી રકમ પડાવીને બોગસ વિઝા અને જોબ ઓફ લેટર અપાવ્યા હતા. આરોપીઓએ ૩૯ લોકો સાથે છેતરપિંડી આચરીને ત્રણ કરોડથી વધારેની રકમની છેતરપિંડી કરી હતી. આ અંગે વધુ પુછપરછ કરતા જાણવા મળ્યું હતું કે આરોપીઓએ મુંબઇમાં રહેતા તબરેજ ગુલામ રસુલ નામના વ્યક્તિની મદદથી બોગસ વિઝા સ્ટીકર મેળવ્યા હતા અને તબરેજ સમગ્ર દેશમાં આ પ્રકારનું કૌભાંડ ચલાવે છે.
