અલંગ પોલીસ મથકમાં 6 સામે ગુનો નોંધાયો
રૂપિયા લઈ લગ્ન કર્યાં હતા, ડોક્યુમેન્ટ લેવા અમદાવાદ ગયા બાદ યુવતી પરત આવી નહી
ભાવનગર: તળાજાના માંડવા ગામના યુવક સાથે લગ્નના નામે રૂ.૨.૫૦ લાખની છેતરપિંડીની ફરિયાદ ૬ સામે અલંગ પોલીસ મથકમાં નોંધાઈ છે.
તળાજા તાલુકાના માંડવા ગામે રહેતા જીજ્ઞોશભાઈ રમેશભાઈ વ્યાસે અલંગ પોલીસ મથકમાં પરીબેન (રહે.અમદાવાદ), અશોક મનુભાઈ મકવાણા (રહે.વરતેજ), દીપાલીબેન (રહે.ટંકારા), પારીબેન સતવાણી, પારીબેનના પતિ (બન્ને રહે.અમદાવાદ) અને પુજાબેન વિરૂદ્ધ ફરિયાદ નોંધાવી હતી. તેઓ લગ્ન કરાવી દલાલીનું કામ કરતા અશોક મકવાણાના સંપર્કમાં આવ્યા હતા જેણે દિપાલીબેન મારફત પરી નામની યુવતી સાથે પરિચય કરાવ્યો હતો અને રૂ.૨.૫૦ લાખ લઈ તેમના લગ્ન પરી સાથે નક્કી કર્યાં હતા અને ગત તા.૩૧-૦૩-૨૦૨૫ના રોજ તેમણે પરી સાથે કુટુંબીજનોની હાજરીમાં ગામમાં આવેલા ઠાકર મંદિર ખાતે ફુલહાર કરી લગ્ન કરી લીધાં હતા. ગત તા.૫-૪ના રોજ પરીબેને અમદાવાદ ડોક્યૂમેન્ટ લેવા જવું છે તેમ કહીને ગયા બાદ આજદીન સુધી પરત આવ્યા નહી. આ બાબતે લગ્ન નક્કી કરાવનારા ઉક્ત બાકીના લોકોને કહેતા તેમણે પરીબેનને પરત નહી મોકલી તથા રૂપિયા પરત નહી આપી વિશ્વાસઘાત કરી ઠગાઈ કરી હતી. આ અંગે અલંગ પોલીસે ગુનો નોંધ્યો છે.
