રાજકોટમાં એકંદરે શાંતિપૂર્ણ ચૂંટણી, ક્યાંક તંત્ર સામે કચવાટ : લોકોને નામ ઓનલાઈન શોધવા કહ્યું : શોધીને જાય તો મોબાઈલની ના! : વેસ્ટમાં મથકો બપોરે સૂમસામ, વોર્ડ-4માં મતદારની જાણબહાર મતદાન
રાજકોટ, : રાજકોટમાં ધારાસભાની ચૂંટણીમાં ચૂંટણીતંત્ર દ્વારા જેટલો રસ લેવાયો એટલો આ વખતે સરકારી તંત્ર દ્વારા લેવાયો નથી. એક તો શરૂઆતમાં લોકોને મતદાન અંગે પર્યાપ્ત વિગતો પૂરી પાડવામાં ઉદાસીનતા રહી, બેલેટ પેપરથી કેટલા ટકા મતદાન સહિતની વિગતો જાહેર ન કરી અને ખાસ તો આ વખતે મતદારયાદી સઘન સુધારણા પછી મતદારોને બુથ શોધવા સ્લીપની જરૂર હોવા છતાં સ્લીપ અપાઈ નહીં અને ઓનલાઈન વેબસાઈટ પર નામ શોધી શકાશે તેવું જાહેર કર્યું. પરંતુ, આજે બુથ પર મતદાર પોતાનું નામ શોધીને જાય તો મોબાઈલ અંદર લાવવાનો અનેક જગ્યાએ ઈન્કાર કરાતા માથાકૂટ થઈ હતી. તો કેટલાક નેતાઓ બુથમાં આંગળી દેખાડીને ફોટા પડાવ્યા હતા.
-કેટલાક વિસ્તારમાં મોબાઈલની ના પડાતા મતદારોએ અમારે તે ક્યાં સાચવવા, જાવ મતદાન નથી કરવું તેમ કહીને નારાજગી વ્યક્ત કરી હતી. -એક તરફ શહેરમાં વયોવૃધ્ધ, દિવ્યાંગો પણ મતદાન કરવા ઉત્સાહભેર જોવા મળ્યા તો બીજી તરફ યુવાનો પણ ફરક્યા ન્હોતા. -વોર્ડ નં.4ના એક બુથ પર એક મતદારના નામે બીજાએ મતદાન કરી દેતા કોંગ્રેસના નેતાઓએ ઉગ્ર માથાકૂટ કરી હતી બાદમાં મતદાન કરવા દેવાયું હતું. -વેસ્ટઝોનમાં બપોરના સમયે મોટાભાગના બુથ સૂમસામ નજરે પડતા હતા જ્યાં એક સમયે દરેક ચૂંટણી વખતે લાંબી કતારો લાગતી તે કતારો જોવી દુર્લભ બની ગઈ હતી. -તો બીજી તરફ, જંગલેશ્વર સહિત કેટલાક વિસ્તારોમાં મતદારોની રાબેતામૂજબ લાઈનો જોવા મળી હતી. -કોંગ્રેસના નેતાઓેએ ફરિયાદ કરી કે અગાઉ ચૂંટણી વખતે અધિકારીઓ લોકોને તેમનું નામ શોધવા માટે બેઠા હોય તેવું આ વખતે જોવા મળતું ન્હોતું.
