અમદાવાદ, શનિવાર
વટવામાં બે બાઇક સામ સામે અથડાતાં ગોમતીપુરના યુવકનું સારવાર દરમિયાન મોત થયું હતું. જેમાં પરિવારજનોએ ફોેન કરતાં યુવકે થોડીવારમાં આવું છું કહેતા પરિવારજનો સૂઇ ગયા હતા. મધરાતે ફોન કરતાં હોસ્પિટલના કર્મચારીએ ફોન ઉપાડીને અકસ્માતની જાણ કરી હતી. આ બનાવ અંગે ટ્રાફિક પોલીસે ગુનો નોંધી વધુ તપાસ હાથ ધરી છે.
થોડીવારમાં આવું છું કહેતા પરિવારજનો સૂઇ ગયા ઃ મધરાતે હોસ્પિટલ સ્ટાફે ફોન ઉપાડયો
ગોમતીપુરમાં ચારતોડા કબ્રસ્તાન પાસે રહેતા અને છૂટક મજૂરી કરતા આધેડે ટ્રાફિક જે ડિવિઝન પોલીસ સ્ટેશનમાં અજાણ્યા બાઇક ચાલક સામે ફરિયાદ નોંધાવી છે કે છે તા. ૨૩ના રોજ તેમનો ૨૨ વર્ષનો દિકરો બાઇક લઇને કામ અર્થે વટવા ખાતે ગયો હતો. પિતાએ ફોન કરતાં થોડીવારમાં ઘરે આવું છું કહેતા પરિવારના સભ્યો સૂઇ ગયા હતા.
દરમિયાન રાતે ત્રણ વાગે જાગીને દિકરાને ફોન કરતાં તે ઉપાડતો નથી જેથી તેના મિત્રને ફોન કરીને જાણ કરતાં તેણે ફોન કરતાં એલ.જી.હોસ્પિટલમાંથી કર્મચારીએ તેનો ફોેન ઉપાડીને વટવા કેનાલ પાસે અકસ્માત થયો હોવાની વાત કરી હતી. જો કે સારવાર દરમિયાન યુવકનું મોત થયું હતું. પરિવારજનોએ સ્થળ પર જઇને તપાસ કરતાં અકસ્માત સ્થળે મૃતક યુવકનું અને અકસ્માત કરનારા શખ્સનું બાઇક પડેલું હતું. આ ઘટના અંગે ટ્રાફિક પોલીસે ગુનો નોંધીને સીસીટીવી ફૂટેજ અને બાઇક નંબર આધારે વધુ તપાસ હાથ ધરવામાં આવી રહી છે.
