ન્યુ વીઆઇપી રોડ પર નવરાત્રી દરમિયાન એટીએમ તોડવાના બનેલા બનાવમાં ક્રાઇમ બ્રાન્ચે રાજસ્થાનથી ખાસ એટીએમ તોડવા આવેલા ચોરને ઝડપી પાડયો છે.
વડોદરાઃ ન્યુ વીઆઇપી રોડ પર આવેલા નિલનંદન કોમ્પ્લેક્સના એસબીઆઇના એટીએમમાં ગઇ તા.૨૩મી સપ્ટેમ્બરે રાતે ૩ વાગે એક યુવક ઘૂસ્યો હતો અને હથોડાના ઘા મારી કેશ બોક્સ તોડવાનો પ્રયાસ કર્યો હતો.પરંતુ તેને સફળતા નહિ મળતાં ત્યાંથી ભાગી ગયો હતો.
ક્રાઇમ બ્રાન્ચે સીસીટીવી ફૂટેજ તેમજ બાઇકના નંબરને આધારે એક પછી એક કડીઓ જોડી આરોપીનું પગેરું શોધી કાઢ્યું હતું.વીસેક દિવસના બ્રેક પછી ચોર ફરી વડોદરામાં આવતાં જ પીઆઇ આરજી જાડેજાની ટીમે જગદીશસિંગ ઉર્ફે રાહુલ બાબુસિંગ રાવત(આમનેર ગામ,રાજસમંદ,રાજસ્થાન)ને ચોરીની બાઇક સાથે સુરસાગર પાસેથી ઝડપી પાડયો હતો.
પોલીસની પૂછપરછ દરમિયાન આરોપીએ કબૂલ્યું હતું કે,અગાઉ વડોદરા નોકરી કરી ગયો હોવાથી વિસ્તારોનો જાણકાર હતો.એક સાથે મોટી રકમ મેળવવાના ઇરાદે તે વડોદરા આવ્યો હતો.દાંડિયા બજારમાંથી બાઇક ચોરી હતી અને હથોડા વડે એટીએમનું કેશબોક્સ તોડવાનો પ્રયાસ કર્યો હતો.પણ સફળતા મળી નહતી.ત્યારબાદ તે બાઇક લઇ સુરત ગયો હોવાની પણ વિગતો જાણવા મળી છે.
કેમેરામાંથી ક્યા કરતા હૈ..તેમ અવાજ આવતાં જ ચોર નાઠો
પોલીસના જણાવ્યા પ્રમાણે,ચોરે એટીએમ તોડવા માટે હથોડો મારતાં જ સેન્સર બ્રેક થયું હતું અને મુંબઇની સર્વેલન્સ ટીમને એલર્ટ મેસેજ મળ્યો હતો.જેથી ટીમના કર્મચારીએ સીસીટીવી પર જ ક્યા કરતા હૈ..તેમ પૂછતાં ચોર ગભરાયો હતો અને કામ પડતું મુકી એટીએમમાંથી ભાગી ગયો હતો.
