Vadodara : ટ્રાફિકથી ધમધમતા સંગમ ચાર રસ્તા વિસ્તારથી વોર્ડ નં. 4ના જાહેર રોડ રસ્તાના હંગામી દબાણોના સફાયાના કારણે રોડ રસ્તા પર ઠેર ઠેર ટ્રાફિકજામ જોવા મળ્યો હતો. જોકે સ્થાનિક પોલીસ કાફલાએ તમાશો જોવા એકત્ર થયેલા ટોળાને સમજાવટથી દૂર કર્યા હતા. દબાણ શાખાની ટીમે કુલ ત્રણ ટ્રક જેટલો માલ સામાન કબજે કર્યો હતો.
ઉલ્લેખનીય છે કે, સંગમ ચાર રસ્તા વિસ્તારમાં ખાણી પીણી સહિત ચા પાણીની લારીઓ તથા લારી ગલ્લા પથારાવાળાઓના કારણે રોડ રસ્તા સાંકડા થઈ જવાથી વાહનચાલકોમાં સતત અકસ્માતનો ભય રહ્યા કરતો હોય છે. જેથી પાલિકા તંત્રની દબાણ શાખાની ટીમ સંગમ ચાર રસ્તા વિસ્તારમાં આજે ત્રાટકી હતી. પરિણામે લારી ગલ્લા પથારાવાળાઓમાં ભાગદોડ મચી હતી. આમ છતાં પણ દબાણ શાખાની ટીમે કેટલીક લારીઓ સહિત ગલ્લા તથા અન્ય માલ સામાન કબજે કરવાની કાર્યવાહી કરી હતી. ત્યારબાદ ટીમ વોર્ડ નં. 4ના જાહેર રોડ રસ્તા પર પહોંચી હતી. જ્યાંથી પણ ગેરકાયદે દબાણોનો સફાયો કર્યો હતો આ કામગીરીમાં આસિ. મ્યુનિ. કમિશનર તુવેર, વોર્ડ ઓફિસર સહિત દબાણ શાખાની ટીમને એસઆરપી અને સ્થાનિક પોલીસ તંત્રનો કાફલો મદદમાં જોડાયો હતો. કામગીરી દરમિયાન કુલ ત્રણ ટ્રક જેટલો માલ સામાન કબજે કરવામાં આવ્યો હતો.
