અમદાવાદ, શુક્રવાર
વિદેશ જવાની ઘેલછામાં વધુ એક શ્રમજીવી યુવકે લાખો રૃપિયા ગુમાવ્યા હોવાનો કિસ્સો પ્રકાશમાં આવ્યો છે. વસ્ત્રાલમાં રહેતા અને કેટરિંગનો વ્યવસાય કરતા યુવક પાસે તેના મિત્રએ પોલેન્ડના વર્ક પરમિટ વિઝા અપાવવાનું કહીને રૃા. ૩.૫૫ લાખ પડાવ્યા છે. જેમાં ખાનગી રીતે તપાસ કરતા એજન્ટે પોલેન્ડ માટે કોઇ અરજી જ કરી ન હતી. જેથી રૃપિયા પરત માંગતા ધક્કા ખવડાવીને આપવાની ના પાડી હતી. આખરે કંટાળીને મિત્ર સામે રામોલ પોલીસ સ્ટેશનમાં છેતરપિંડીની ફરિયાદ નોંધાવી છે.
તપાસ કરતા અરજી જ ન કરી ન હતી, બે વર્ષ પછી રૃપિયા પાછા આપવાની ના પાડી ઃ રામોલ પોલીસે છેતરપીડીનો ગુનો નોંધી વધુ તપાસ હાથ ધરી
વસ્ત્રાલમાં રહેતા યુવકે રામોલ પોલીસ સ્ટેશનમાં વસ્ત્રાલ રહેતા અને વિઝા એજન્ટ તરીકેની કામગીરી કરતા એજન્ટ સામે ફરિયાદ નોંધાવી છે કે ૨૦૧૮માં તેમને આરોપી સાથે પાન પાર્લર ઉપર મુલાકાત થતાંં બંને વચ્ચે મિત્રતા થઇ હતી. જ્યારે આરોપીએ કોઇને વિદેશ જવું હોય તો વિઝાના કામનો ધંધો કરે છે અને ઘણાને વિદેશ મોકલેલા છે તેમ કહ્યું હતું
જેથી ફરિયાદીએ બે વર્ષ પહેલા યુવકને વિદેશ જવા માટે વિઝા કઢાવી આપવાનું કહી અને પોલેન્ડ યુરોપના વર્ક પરમિટ માટેના પેપર તૈયાર છે તમને વિઝા કઢાવી આપીશ તેનો આઠ લાખ રૃપિયા ખર્ચ થશે અને ચાર મહિના જેટલો સમય પ્રોસેસમાં થશે એટલું જ નહી વિઝા ના થાય તો રૃપિયા પાછા આપી દઇશ તેમ કહ્યું હતું જેથી યુવકે તમામ ડોક્યુમેન્ટ આપીને વિઝા પ્રોસેસ માટે કુલ રૃા. ૩.૫૫ લાખ આપ્યા હતા. જો કે ખાનગી રીતે તપાસ કરતા પોલેન્ડ કોઇ અરજી મોકલી જ ન હતી અને રૃપિયા પરત માંગતા ગોળ ગોળ જવાબ આપીને રૃપિયા પરત આપવાની સ્પષ્ટ ના પાડી દીધી હતી.
