Vadodara : વડોદરા શહેરના સમા સ્પોર્ટ્સ કોમ્પ્લેક્સ ખાતે આયોજિત વર્લ્ડ ટેબલ ટેનિસ યુથ કન્ટેન્ડર સ્પર્ધામાં અંડર-19 બોયઝ અને ગર્લ્સ સિંગલ્સ કેટેગરીમાં પ્રિયનુજ ભટ્ટાચાર્ય અને મિકુ માત્સુશિમાએ શાનદાર પ્રદર્શન સાથે ખિતાબ જીત્યો હતો.
અંડર-19 બોયઝ સિંગલ્સની ફાઇનલમાં પ્રિયનુજ ભટ્ટાચાર્યે સાર્થક આર્યને પરાજય આપ્યો હતો. જ્યારે ગર્લ્સ અંડર-19 સિંગલ્સમાં મિકુ માત્સુશિમાએ ટોચના ક્રમાંકિત દિવ્યાંશી ભૌમિકને હરાવીને ચેમ્પિયનશિપ પર કબજો કર્યો હતો. મિકુએ સેમિફાઇનલમાં બીજી ટોચની ભારતીય જુનિયર ખેલાડી જેનિફર વર્ગીસને પણ પરાજિત કરી હતી. અંડર-15 કેટેગરીમાં શ્રીજાની ચક્રવર્તી અને આદિત્ય દાસએ ટાઇટલ જીત્યા હતા. ઉલ્લેખનીય છે કે સિન્ડ્રેલા દાસએ આ સ્પર્ધામાં અગાઉ ગર્લ્સ અંડર-17 સિંગલ્સ તેમજ અંડર-19 મિક્સ્ડ ડબલ્સનો ટાઇટલ જીત્યો હતો. અંડર-11 કેટેગરીમાં આદ્યા બહેતી અને રાજદીપ બિશ્વાસએ ખિતાબ પોતાના નામે કર્યો હતો. સ્પર્ધા દરમિયાન દેશ-વિદેશના યુવા ખેલાડીઓના ઉત્કૃષ્ટ પ્રદર્શનથી દર્શકોમાં ખાસ ઉત્સાહ જોવા મળ્યો હતો.
