Valsad Police Physical Test: વલસાડના કામરેજ તાલુકાના વાવ ગામે એસઆરપી કેમ્પર્સમાં ગુજરાત પોલીસ ભરતીની શારીરિક કસોટી દરમિયાન વધુ એક આશાસ્પદ યુવાનનું મોત નિપજતા શોકનું મોજું ફરી વળ્યું હતું. દોડ સમયે વલસાડના 27 વર્ષના યુવાનની તબિયત લથડતા અને ત્યારબાદ હોસ્પિટલમાં સારવાર દરમિયાન મોત નિપજ્યું હતું.
13માં રાઉન્ડ પૂર્ણ કર્યા યુવક ઢળી પડ્યો
વલસાડ ખાતે દેવ દર્શન સોસાયટી, મોગરાવાડી ખાતે પ્રવિણ બારીયા પરિવાર સાથે રહે છે અને વલસાડ રેલવે પોલીસમાં ફરજ બજાવે છે. તેમનો પુત્ર 27 વર્ષીય રવિન્દ્ર બારીયા ઘણાં સમયથી પોલીસ ભરતીની તૈયારી કરી રહ્યો હતો. શનિવારે વહેલી સવારે રવિન્દ્ર બારીયાની શારીરિક કસોટી નિર્ધારિત હતી. જે માટે રવિન્દ્ર બારીયા શુક્રવારે તેના ડ્રાઈવર વિવેક પટેલ સાથે કામરેજ ખાતેના ગેસ્ટ હાઉસમાં રોકાયો હતો. શનિવારે સવારે છ વાગ્યાની આસપાસ એસ.આર.પી. ગ્રાઉન્ડમાં રવિન્દ્ર દોડી રહ્યો હતો. દોડના 13 રાઉન્ડ પૂર્ણ કર્યા બાદ અચાનક તેના પગમાં દુઃખાવો ઉપડ્યો અને ચક્કર આવતા તે ગ્રાઉન્ડ પર જ ઢળી પડ્યો હતો. ફરજ પરની 108 એમ્બ્યુલન્સ દ્વારા રવિન્દ્ર બારીયાને તાત્કાલિક સુરત નવી સિવિલ હોસ્પિટલ દાખલ કર્યો હતો. જ્યાં પ્રાથમિક સારવાર બાદ તેને રજા આપવામાં આવી હતી. જેથી રવિન્દ્ર પરત ગેસ્ટ હાઉસ આવ્યો હતો. જોકે, થોડીવારમાં રવિન્દ્ર બારીયાને ફરીથી પગ અને છાતીમાં સખત દુઃખાવો ઉપડ્યો હતો. જેથી તાત્કાલિક નજીકની ખાનગી હોસ્પિટલ અને ત્યારબાદ વધુ સારવાર માટે કામરેજની ખાનગી હોસ્પિટલમાં લઈ જતાં ફરજ પરના ડોક્ટરે મૃત જાહેર કર્યો હતો.
આ પણ વાંચો: ગુજરાતમાં નવા-જૂનીના એંધાણ, કોંગ્રેસની કમાન સચિન પાયલટને સોંપાય તેવી શક્યતા
બનાવની જાણ થતા જ વલસાડથી રવિન્દ્રના પિતા પ્રવિણભાઈ અને પરિવારજનો દોડી આવ્યા હતા. રવિન્દ્ર બારીયા પોલીસ ભરતીમાં સફળ થઈને પિતાની જેમ ખાખી પહેરવાનું સપનું જોતા અકાળે અવસાનથી વલસાડ પોલીસ પરિવાર અને સ્થાનિકોમાં ઘેરા શોકની લાગણી પ્રસરી ગઈ હતી. કામરેજ પોલીસે અકસ્માત મોતનો ગુનો નોંધી કાયદેસરની કાર્યવાહી હાથ ધરી છે.
