વડોદરા,વિધવાને લગ્નની લાલચ આપી શારીરિક શોષણ કર્યા પછી વતન જતા રહેલા આરોપીએ વિધવાનો નંબર પણ બ્લોક કરી દીધો હતો. જેથી, મહિલાએ તેની સામે પોલીસ સ્ટેશનમાં ફરિયાદ નોંધાવી છે.
જાન્યુઆરી ૨૦૨૪ માં એક લગ્ન પ્રસંગમાં ૩૮ વર્ષની વિધવાનો પરિચય કેટરિંગના મેનેજર હિતેશ લાલચંદભાઇ લબાના, ઉં.વ.૩૮ (રહે. મહાશક્તિ વુડાના મકાનમાં, પાણીની ટાંકી સામે, મૂળ રહે. ગામ માંડા,તા.ડુંગરપુર, રાજસ્થાન) સાથે થયો હતો. ત્યારબાદ બંને વચ્ચે મિત્રતા થઇ હતી. હિતેશે મહિલા સાથે લગ્નની વાત કરી હતી. ત્યારબાદ તેઓ અવારનવાર મળતા હતા. આજવા રોડ પર આવેલી હોટલ માનસરોવરમાં હિતેશ મહિલાને લઇ ગયો હતો. ત્યાં તેેને મહિલા સાથે પ્રથમ વખત શારીરિક સંબંધ બાંધ્યો હતો.ત્યારબાદ હિતેશે અવારનવાર આ રીતે સંબંધ બાંધ્યા હતા. હિતેશે મહિલાને કહ્યું હતું કે, લગ્ન પ્રસંગનું કામ રોજ મળતું નથી.મારે ચા નાસ્તાની દુકાન કરવી છે. હાલમાં મારી પાસે રૃપિયા નથી. મહિલાએ દુકાન કરવા માટે તેને ૨ લાખ આપ્યા હતા. ત્યારબાદ હિતેશે ખોડિયાર નગર ખાતે દુકાન ખોલી હતી. બે મહિના સુધી દુકાન ચલાવ્યા પછી ધંધો બરાબર ચાલતો નહીં હોવાથી તેણે દુકાન બંધ કરી દીધી હતી.
મહિલાએ લગ્નની વાત કરતા હિતેશે એવો જવાબ આપ્યો હતો કે, હું વતન જઇને મારા પરિવાર સાથે વાતચીત કર્યા પછી તારી સાથે લગ્ન કરીશ. વતન ગયા પછી હિતેશે મહિલાનો નંબર બ્લોક કરી દીધો હતો અને દોઢ વર્ષથી તે પરત આવ્યો જ નહતો. તેમજ રૃપિયા પણ પરત કર્યા નહતા. મહિલાએ હિતેશના વતનમાં જઇને તપાસ કરતા પણ હિતેશ મળ્યો નહતો. જે અંગે પોલીસે ગુનો દાખલ કરી વધુ તપાસ હાથ ધરી છે.
