અમદાવાદ : વૈશ્વિક અનિશ્ચિતતા વચ્ચે ભારત પાસે આંતરરાષ્ટ્રીય વેપાર અને ઉત્પાદનમાં પોતાની સ્થિતિ મજબૂત કરવાની તક છે, પરંતુ ખાનગી ક્ષેત્ર અને નીતિ નિર્માતાઓએ આ પડકારો પ્રત્યે સચેત રહેવાની અને મૂડી નિર્માણને દબાવવાનું ટાળવાની જરૂર છે તેમ નાણાં મંત્રાલયે જણાવ્યું હતું.
માર્ચ મહિનાની માસિક આર્થિક સમીક્ષામાં, નાણા મંત્રાલયે જણાવ્યું હતું કે, લાંબા સમય સુધી અનિશ્ચિતતાની ધારણા ખાનગી ક્ષેત્રને મૂડી નિર્માણ યોજનાઓ પર રોક લગાવવા તરફ દોરી શકે છે. ખાનગી ક્ષેત્ર અને નીતિ નિર્માતાઓએ આ જોખમથી વાકેફ રહેવાની જરૂર છે. તે જ સમયે, અનિશ્ચિતતા પોતાને હાવી ન કરે તે માટે તાત્કાલિક પગલાં લેવા જોઈએ.
નાણાકીય વર્ષ ૨૦૨૫-૨૬માં વૈશ્વિક વિકાસને કારણે ઊભી થતી અનિશ્ચિતતાઓ વૃદ્ધિ માટે જોખમ હોવાનું જણાવતા, નાણા મંત્રાલયે જણાવ્યું હતું કે, ભૌગોલિક રાજકીય વિકાસ પર સતત ધ્યાન કેન્દ્રિત કરીને, ભારત આ જોખમોને ઘટાડી શકે છે. દેશ વ્યૂહાત્મક વેપાર વાટાઘાટો, સ્થાનિક સુધારાઓ અને ઉત્પાદન રોકાણોમાં ઉભરતી તકોનો લાભ લઈ શકે છે.
નાણા મંત્રાલયે ચાલુ વૈશ્વિક વેપાર અવરોધોથી ઉદ્ભવતા જોખમોનું નજીકથી નિરીક્ષણ કરવા અને વણઉપયોગી બજારોમાં વૈવિધ્યીકરણ કરવા માટે પણ હાકલ કરી હતી. ખાનગી ક્ષેત્ર માટે તેના ઉત્પાદનોમાં વૈવિધ્ય લાવવાનો અને ગુણવત્તા સુધારવાનો સમય આવી ગયો છે. સામાન્ય દિવસોથી વિપરીત, કાર્યવાહી અને અમલીકરણની અસર હવે વધુ છે.
આ એક એવી તક છે જેને ચૂકવી ન જોઈએ. જ્યારે ભૂ-રાજકીય તણાવ, પુરવઠા શૃંખલામાં વિક્ષેપો, ટેરિફ અને વેપાર સંબંધિત અનિશ્ચિતતાઓ વૈશ્વિક વિકાસ માટે જોખમો ઉભા કરે છે, ત્યારે ભારતીય અર્થતંત્ર પ્રત્યે સરકારનો દ્રષ્ટિકોણ સકારાત્મક છે.
વૈશ્વિક પરિસ્થિતિમાં અશાંતિ હોવા છતાં, અર્થતંત્ર સ્થિતિસ્થાપકતા દર્શાવવાનું ચાલુ રાખે છે અને ફુગાવાના દબાણને હળવું કરવા, વધતી વપરાશ માંગ, નાણાકીય શિસ્ત, શ્રમ બજાર સ્થિરતા અને નાણાકીય ક્ષેત્રની સુગમતા દ્વારા વૃદ્ધિ ગતિને ટેકો મળી રહ્યો છે.
વ્યાજ દરમાં ઘટાડાથી એકંદર ફુગાવાના અંદાજમાં સુધારો થયો છે, અને ખાદ્યપદાર્થોના ભાવ યોગ્ય દિશામાં આગળ વધી રહ્યા છે, પરંતુ ચેતવણી આપવામાં આવી છે કે ભૂ-રાજકીય અનિશ્ચિતતાઓ પર નજર રાખવાની જરૂર છે.
