Pune Municipal Elections 2025: પુણે મહાનગરપાલિકાની ચૂંટણીમાં હવે માત્ર ત્રણ અઠવાડિયા બાકી છે, ત્યારે સત્તા મેળવવા માટે ઉમેદવારોએ સામ-દામ-દંડ-ભેદની તમામ નીતિઓ અપનાવી દીધી છે. મતદારોને રીઝવવા માટે ઉમેદવારો વિદેશ પ્રવાસથી લઈને મોંઘી ગાડીઓ અને સોનાના ઘરેણાં જેવી લલચામણી ભેટોની લ્હાણી કરી રહ્યા છે.
લકી ડ્રોમાં પ્લોટ અને થાઈલેન્ડ ટૂરની ઓફર
પુણે મહાનગરપાલિકાની આગામી ચૂંટણીને ધ્યાનમાં રાખીને વિવિધ વોર્ડમાં ઉમેદવારો દ્વારા મતદારોને રીઝવવા માટે નાણાકીય શક્તિ અને પ્રભાવનું અભૂતપૂર્વ પ્રદર્શન કરવામાં આવી રહ્યું છે. લોહગાંવ-ધાનોરી વોર્ડમાં એક ઉમેદવારે તો ‘લકી ડ્રો’ દ્વારા 11 લકી મતદારોને 1100 ચોરસ ફૂટના પ્લોટ આપવાનું વચન આપી રજિસ્ટ્રેશન પણ શરૂ કરી દીધું છે, જ્યારે વિમાન નગરમાં દંપતીઓ માટે થાઈલેન્ડની 5 દિવસની લક્ઝરી ટૂરની લલચામણી ઓફર આપવામાં આવી રહી છે.
તેમજ મહિલા મતદારોને આકર્ષવા માટે હજારોની સંખ્યામાં કિંમતી પૈઠણી સાડીઓ, સિલાઈ મશીનો અને સાયકલોનું વિતરણ કરવામાં આવ્યું છે, તો બીજી તરફ યુવા મતદારો માટે 1 લાખ રૂપિયાના રોકડ ઇનામો સાથેની ક્રિકેટ લીગનું આયોજન કરી ઉમેદવારો ચૂંટણીમાં પોતાની નાણાકીય ક્ષમતાનો પરચો બતાવી રહ્યા છે.
પવાર પરિવારમાં બેઠકોની વહેંચણી મુદ્દે ગરમાવો
પુણે મહાનગરપાલિકાની 15 જાન્યુઆરીએ યોજાનારી આગામી ચૂંટણીને લઈને રાજકીય ગરમાવો તેજ થયો છે, જેમાં ખાસ કરીને પવાર પરિવારના બંને જૂથો વચ્ચે બેઠકોની વહેંચણી મુદ્દે ગજગ્રાહ જોવા મળી રહ્યો છે. ગત વર્ષે રાજકીય માર્ગો અલગ કર્યા બાદ હવે શરદ પવાર અને અજિત પવારના જૂથો વચ્ચે સમજૂતી માટે બેઠકોનો દોર શરૂ થયો છે, જેમાં સૂત્રોના જણાવ્યા અનુસાર શરદ પવાર જૂથ 40થી 45 બેઠકો પર દાવો કરી રહ્યું છે, જ્યારે અજિત પવાર 30થી વધુ બેઠકો આપવા તૈયાર નથી. ગત રાત્રે બંને પક્ષના વરિષ્ઠ નેતાઓ વચ્ચે પ્રથમ રાઉન્ડની મંત્રણા પૂર્ણ થઈ છે, પરંતુ આ બેઠકોના જટિલ ગણિત અંગેનો અંતિમ નિર્ણય હવે સુપ્રિયા સુલે સાથેની નિર્ણાયક ચર્ચા બાદ જ લેવામાં આવે તેવી શક્યતા છે.
આ પણ વાંચો: ચૂંટણી પહેલા મતુઆ વૉટર્સને લઈને બંગાળમાં રાજકારણ ગરમાયું, 45 બેઠકો પર બદલાઈ શકે છે સમીકરણ
ઠાકરે ભાઈઓના મિલાપથી MVAમાં ભંગાણ?
મહારાષ્ટ્રના રાજકીય ફલક પર એક મોટો ઉલટફેર જોવા મળ્યો છે, જ્યાં 20 વર્ષના લાંબા ગાળા બાદ ઉદ્ધવ ઠાકરે અને રાજ ઠાકરે વચ્ચેના મનભેદનો અંત આવ્યો છે. શિવસેના(UBT) અને MNS વચ્ચે રચાયેલા આ નવા સમીકરણોએ વિપક્ષી ગઠબંધન ‘મહા વિકાસ અઘાડી'(MVA) માટે કપરા ચઢાણ ઊભા કર્યા છે. આ નવી ભાગીદારીથી નારાજ થયેલા કોંગ્રેસ અને શરદ પવાર જૂથે રણનીતિક પગલું ભરીને માત્ર આ આગામી ચૂંટણી પૂરતો જ MVAથી છેડો ફાડવાનો નિર્ણય લીધો છે.
