BJP women MPs letter to Speaker Om Birla: સંસદના બજેટ સત્ર દરમિયાન લોકસભામાં વિરોધ પક્ષના સાંસદો દ્વારા કરવામાં આવેલા હોબાળા અને અશોભનીય વર્તન મામલે હવે રાજકારણ ગરમાયું છે. ભાજપના મહિલા સાંસદોએ આ મામલે સખત નારાજગી વ્યક્ત કરતા લોકસભા અધ્યક્ષ ઓમ બિરલાને એક પત્ર લખીને વિપક્ષી સાંસદો સામે કડક કાર્યવાહી કરવાની માંગ કરી છે. આ પત્રમાં 4 ફેબ્રુઆરી, 2026ના રોજ ગૃહમાં બનેલી ઘટનાઓને ‘લોકતાંત્રિક ઈતિહાસની સૌથી કાળી ક્ષણ’ ગણાવવામાં આવી છે.
ભાજપના મહિલા સાંસદોએ વિપક્ષી વર્તન સામે વ્યક્ત કરી નારાજગી
ભાજપના મહિલા સાંસદોએ પત્રમાં ગંભીર આક્ષેપો કરતા જણાવ્યું છે કે, રાષ્ટ્રપતિના અભિભાષણ પરના આભાર પ્રસ્તાવની ચર્ચા દરમિયાન વિપક્ષી સભ્યોએ ગૃહની તમામ મર્યાદાઓ ઓળંગી દીધી હતી. આ સાંસદો માત્ર ગૃહના ‘વેલ’માં જ નહોતા ઘૂસ્યા, પરંતુ ગૃહના ટેબલ પર ચઢી ગયા હતા અને સરકારી દસ્તાવેજો ફાડીને અધ્યક્ષની ખુરશી તરફ ફેંક્યા હતા. પત્રમાં લખવામાં આવ્યું છે કે વિપક્ષના આ પ્રકારના કૃત્યથી આપણી લોકતાંત્રિક સંસ્થાઓની છબી ખરડાઈ છે.
આ પણ વાંચો: લોકસભા સ્પીકર ઓમ બિરલાને પદથી હટાવવા અવિશ્વાસ પ્રસ્તાવની નોટિસ, વિપક્ષના 118 સાંસદોની સહી
મહિલા સાંસદોનું આક્રમક વલણ
આ ઉપરાંત, પત્રમાં ખાસ કરીને કેટલીક મહિલા વિપક્ષી સાંસદોના આક્રમક વર્તન અને સત્તાધારી પક્ષની બેઠકો સુધી ઘૂસી આવવા સામે પણ વાંધો ઉઠાવવામાં આવ્યો છે. ભાજપના સાંસદોનો દાવો છે કે વિપક્ષી સભ્યોએ હાથમાં બેનરો અને પ્લેકાર્ડ્સ લઈને વડાપ્રધાનની સીટને ઘેરી લીધી હતી અને વરિષ્ઠ મંત્રીઓ સુધી પહોંચી ગયા હતા. એટલું જ નહીં, ગૃહ સ્થગિત થયા બાદ પણ વિપક્ષી સાંસદો અધ્યક્ષના ચેમ્બર તરફ ધસી ગયા હતા અને ત્યાં પણ હોબાળો કરીને અધ્યક્ષનું ઘોર અપમાન કર્યું હોવાના આક્ષેપ ભાજપની મહિલા સાંસદોએ કર્યા છે.
