ગાંધીનગરમાં વધતો જતો તસ્કરોનો તરખાટ
દિવાળી પર્વની રજાઓ દરમિયાન ૪૦ હજાર મીટર કેબલની ચોરી કરીને તસ્કરો ફરાર ઃ પોલીસની તપાસ
ગાંધીનગર : ગાંધીનગર શહેર નજીક આવેલા સરગાસણમાં નવી બની રહેલી
કન્સ્ટ્રક્શન સાઇટ ઉપરથી તસ્કરો દિવાળી પર્વની રજાઓ દરમિયાન ૨૩.૭૩ લાખ રૃપિયાના
કોપર વાયર ચોરીને ફરાર થઈ ગયા હતા જેથી આ સંદર્ભે ઇન્ટરસિટી પોલીસ મથકમાં ફરિયાદ
કરવામાં આવતા પોલીસે ગુનો દાખલ કરીને તપાસ શરૃ કરી છે.
ગાંધીનગર શહેર તેમજ આસપાસના વિસ્તારમાં ચોરીની ઘટનાઓ વધી
રહી છે ત્યારે હવે દિવાળી પર્વ પૂર્ણ થતાની સાથે ચોરીની વિગતો બહાર આવી રહી છે.
ગાંધીનગર શહેર નજીક આવેલા સરગાસણ ખાતે નવી કન્સ્ટ્રક્શન સાઈટ દેવ ઓરમમાંથી તસ્કરો
લાખો રૃપિયાના કેબલ ચોરીને ફરાર થઈ ગયા હતા. જે સંદર્ભે દેવ હાઉસિંગ કોર્પોરેશનના
ભાગીદાર અને અમદાવાદ બોડકદેવ ખાતે રહેતા નીલ મુકેશભાઈ પટેલ દ્વારા ફરિયાદ
નોંધાવવામાં આવી હતી કે, ૧૭
ઓક્ટોબરથી ૩૧ ઓક્ટોબર દરમ્યાન દિવાળી પર્વની રજાઓ હોવાથી બાંધકામ સાઈટ બંધ રાખવામાં
આવી હતી દરમિયાનમાં ગત ૩૧ ઓક્ટોબરના રોજ ૧૧થ૦૦ વાગે કન્સ્ટ્રક્શન સાઇટ ઉપર કારીગરો
આવ્યા હતા તે દરમિયાન ઇલેક્ટ્રીશન રાજેશકુમાર ઠાકોર દ્વારા જાણ કરવામાં આવી હતી કે, એ બ્લોકના ૧૪માં
માળેથી ગ્રાઉન્ડ ફ્લોર સુધીના મુખ્ય ઇલેક્ટ્રીક રૃમ સુધી આવતા પી વી સી પાઇપમાં
લગાવેલ છ સ્ક્વેર એમએમનો કોપર વાયર ચોરાયો છે. જેથી તપાસ કરતા કુલ ૪૦,૦૦૦ મીટર જેટલો
વાયર ચોરાયો હોવાનું જાણવા મળ્યું હતું અને કુલ ૨૩.૭૩ લાખ રૃપિયાની ચોરી અંગે
ઇન્ફોસિટી પોલીસ મથકમાં ફરિયાદ કરવામાં આવતા પોલીસ દ્વારા ગુનો દાખલ કરીને આસપાસના
વિસ્તારના સીસીટીવી ફૂટેજ તપાસી તસ્કરોને પકડી પડવા માટે દોડધામ શરૃ કરવામાં આવી
છે.
