અમદાવાદ, રવિવાર
શહેરના કાલુપુર વિસ્તારમાં છેલ્લા કેટલાક સમયથી અનોખી મોડસ ઓપરેન્ડી દ્વારા નિર્દોષ નાગરિકોને નિશાન બનાવતી એક ખતરનાક આંતરરાજ્ય ગેંગનો કાલુપુર પોલીસે પર્દાફાશ કર્યો છે. પોલીસે આ ગુનામાં સંડોવાયેલા પાંચ આરોપીઓની ધરપકડ કરી છે, જેઓ મૂળ ઉત્તર પ્રદેશના મુરાદાબાદના વતની હોવાનું બહાર આવ્યું છે.
શું હતી લૂંટની અનોખી પદ્ધતિ?
આ ગેંગ અત્યંત ચાલાકીપૂર્વક લૂંટને અંજામ આપતી હતી. આરોપીઓ રસ્તા પર પસાર થતા બાઇક સવારને નિશાન બનાવતા હતા. ગેંગના સભ્યો પોતાની સાઇકલ જાણીજોઈને બાઇક સાથે અથડાવતા હતા. અકસ્માત થયો હોવાનું નાટક કરી બાઇક સવારને ઊભો રાખવામાં આવતો હતો. આ દરમિયાન ગેંગના અન્ય સભ્યો બાઇક સવારને વાતોમાં ભોળવી કે ડરાવીને તેના ખિસ્સામાંથી રોકડ રકમની લૂંટ ચલાવીને પળવારમાં ગાયબ થઈ જતા હતા.
પોલીસે આ રીતે મેળવી સફળતા
કાલુપુર પોલીસ મથકની હદમાં ટૂંકા ગાળામાં એક જ પ્રકારની પદ્ધતિથી બે બનાવો બનતા પોલીસ એક્શનમાં આવી હતી. પી.આઈ એચ આર વાઘેલા સહિતના સ્ટાફે ઘટનાસ્થળના સીસીટીવી ફૂટેજ તપાસ્યા હતા અને બાતમીદારોને સક્રિય કર્યા હતા. ટેકનિકલ સર્વેલન્સ અને બાતમીના આધારે પોલીસે મુશાહિદ હનીફ પઠાણ, મોહમંદ હનીફ પઠાણ, નૌશાદ હુસૈન અબ્બાસી, મોહંમદ ગુલઝેબ અંસારી અને શાનેઆલમ મલિકની ધરપકડ કરી છે.
રેલવે સ્ટેશન નજીક જ કેમ રોકાતા?
પોલીસ પૂછપરછમાં ચોંકાવનારો ખુલાસો થયો છે કે આ ગેંગ હંમેશા રેલવે સ્ટેશનની નજીકની હોટલો કે વિસ્તારોમાં જ આશરો લેતી હતી. આ પાછળનું મુખ્ય કારણ એ હતું કે લૂંટ કર્યા બાદ પોલીસ પકડે તે પહેલાં જ ટ્રેન પકડીને અન્ય રાજ્યમાં સરળતાથી નાસી જઈ શકાય.
દેશભરમાં આચરી છે અનેક લૂંટ
પ્રાથમિક તપાસ મુજબ, આ ગેંગ માત્ર ગુજરાત જ નહીં પરંતુ દેશના અન્ય રાજ્યોમાં પણ સક્રિય હતી અને લાખો રૂપિયાની લૂંટ ચલાવી ચૂકી છે. હાલ કાલુપુર પોલીસે આરોપીઓના રિમાન્ડ મેળવી તેઓએ અન્ય કેટલા ગુના આચર્યા છે અને શહેરમાં તેમને કોણે આશરો આપ્યો હતો તે દિશામાં તપાસ તેજ કરી છે.
