મુંબઈ : ભારત-અમેરિકા વેપાર કરાર ટૂંક સમયમાં થઈ જવાની અપેક્ષા, વિદેશી રોકાણકારોના શરૂ થયેલા પ્રવાહ તથા વૈશ્વિક અનિશ્ચિતતાઓના વાદળો હવે દૂર થઈ રહ્યાના ચિહ્નોથી ભારતીય શેરબજારમાં રોકાણકારોના સેન્ટિમેન્ટમાં સુધારો આવ્યો હતો અને મુખ્ય ઈન્ડાઈસિસ સતત બીજા દિવસે સુધારા સાથે બંધ રહ્યા હતા. ભારતીય બેન્ચમાર્ક ઈન્ડાઈસિસ ૧૪ મહિનાના ગાળા બાદ તેમની ઓલટાઈમ હાઈ સપાટીની એકદમ નજીક બંધ આવ્યા હતા. નિફટી ૫૦ તેની વિક્રમી સપાટીથી ૧૦૦ પોઈન્ટ જ્યારે સેન્સેકસના રેકોર્ડ સ્તરથી હવે ૩૦૦ પોઈન્ટ જ દૂર રહ્યો છે. નિફટીમાં ૨૭ સપ્ટેમ્બર, ૨૦૨૪ના ૨૬૨૭૭ની વિક્રમી સપાટી જોવા મળી હતી જ્યારે સેન્સેકસની ઓલટાઈમ હાઈ ૮૫૯૭૮.૨૫ રહી છે. બીએસઈ સેન્સેકસ ગુરુવારે ઈન્ટ્રાડેમાં ઉપરમાં ૮૫૮૦૧.૭૦ અને નીચામાં ૮૫૨૦૧.૨૨ રહી છેવટે આગલા બંધથી ૪૪૬.૨૧ વધી ૮૫૬૩૨.૬૮ બંધ રહ્યો હતો. જે તેની ઓલટાઈમ હાઈ સપાટીથી ૩૪૬ પોઈન્ટ દૂર હતો. નિફટી૫૦ ઈન્ડેકસ ઉપરમાં ૨૬૨૪૬.૬૫ અને નીચામાં ૨૬૦૬૩.૨૦ વચ્ચે અથડાઈને છેવટે ૧૩૯.૫૦ વધી ૨૬૧૯૨ .૧૫ બંધ રહ્યો હતો જે તેની ઓલટાઈમ હાઈ સપાટીથી ૮૫ પોઈન્ટ છેટે છે. સેન્સેકસ તથા નિફટી૫૦ ઈન્ડેકસ ઈન્ટ્રાડેમાં બાવન સપ્તાહની ઊંચી સપાટી દર્શાવી પાછા ફર્યા હતા. જોકે ક્રુડ તેલના વધી રહેલા ભાવને કારણે રોકાણકારોમાં સાવચેતી પણ જોવા મળી રહી છે.
જાહેર ક્ષેત્રની બેન્કના શેરો દબાણ હેઠળ ઃ
ઊંચા મથાળે પ્રોફિટ બુકિંગે જાહેર ક્ષેત્રની બેન્કોના શેરો દબાણ હેઠળ રહ્યા હતા. એસબીઆઈ રૂપિયા ૧.૨૦ ઘટી રૂપિયા ૯૮૧.૫૫, ઈન્ડિયન બેન્ક રૂપિયા ૩.૨૦ ઘટી રૂપિયા ૮૮૨.૩૫, બેન્ક ઓફ ઈન્ડિયા ૦.૮૭ ઘટી રૂપિયા ૧૪૭.૭૨, યુનિયન બેન્ક રૂપિયા ૧.૨૯ ઘટી રૂપિયા ૧૫૩.૧૯ બંધ રહ્યો હતો. બેન્ક શેરોમાં ઊંચા મથાળે રોકાણકારો હળવા થઈ રહ્યાનું જોવા મળ્યું હતું.
માર્કેટ હેવીવેઈટ શેરોમાં મિશ્ર પ્રવાહ
સપ્ટેમ્બર ત્રિમાસિક પરિણામોની મોસમ પૂરી થવા સાથે સેન્સેકસ હેવી વેઈટ શેરોમાં મિશ્ર વલણ જોવા મળી રહ્યું છે. રિલાયન્સ રૂપિયા ૩૦.૪૫ વધી રૂપિયા ૧૫૪૯.૧૦, આઈટીસી રૂપિયા ૧.૯૫ વધી રૂપિયા ૪૦૫.૫૦, પાવર ગ્રીડ કોર્પ રૂપિયા ૨.૦૫ વધી રૂપિયા ૨૭૭.૩૦ બંધ રહ્યો હતો. એશિયન પેઈન્ટસ રૂપિયા ૩૪ ઘટી રૂપિયા ૨૮૫૯.૧૫, એચયુએલ રૂપિયા ૧૧.૬૫ ઘટી રૂપિયા ૨૪૨૯.૧૦ જ્યારે ટાટા સ્ટીલ ૦.૬૫ ઘટી રૂપિયા ૧૭૨.૪૫ બંધ રહ્યો હતો.
આઈટી શેરોમાં મજબૂતાઈ
ભારત તથા અમેરિકા વચ્ચે વેપાર કરાર થઈ જવાની અપેક્ષાએ આઈટી શેરોમાં લેવાલી રહી હતી. વેપાર કરારથી અમેરિકામાં કાર્યરત ભારતની આઈટી કંપનીઓ માટે સ્થિતિ સાનુકૂળ બની શકે છે. ટેક મહિન્દ્રા રૂપિયા ૨૨.૧૦ વધી રૂપિયા ૧૪૫૬, ઓરેકલ રૂપિયા ૩૯.૫૦ વધી રૂપિયા ૮૩૭૨, વિપ્રો ૦.૧૯ વધી રૂપિયા ૨૪૬.૨૬ બંધ રહ્યા હતા. બાયબેકના પ્રારંભે ઈન્ફોસિસ રૂપિયા ૪.૬૦ ઘટી રૂપિયા ૧૫૩૬.૫૦, ટીસીએસ રૂપિયા ૨.૯૦ ઘટી રૂપિયા ૩૧૪૪.૮૦ બંધ રહ્યા હતા.
FPIs/FIIની રૂ.૨૮૩ કરોડની તથા DIIની રૂ.૮૨૪ કરોડના શેરોની ચોખ્ખી ખરીદી
ફોરેન પોર્ટફોલિયો ઈન્વેસ્ટરો-એફપીઆઈઝ, એફઆઈઆઈઝની આજે-ગુરૂવારે કેશમાં રૂ. ૨૮૩ કરોડની ચોખ્ખી ખરીદી રહી હતી. કુલ રૂ. ૧૪૭૬૯ કરોડની ખરીદી સામે કુલ રૂ. ૧૪૪૮૬ કરોડની વેચવાલી રહી હતી. જ્યારે સ્થાનિક સંસ્થાકીય રોકાણકારો-ડીઆઈઆઈની રૂ. ૮૨૪ કરોડની ચોખ્ખી ખરીદી રહી હતી. કુલ રૂ. ૧૩૦૫૧ કરોડની ખરીદી સામે કુલ રૂ. ૧૨૨૨૭ કરોડની વેચવાલી કરી હતી.
