ધનતેરસના દિવસે કિંમતી ધાતુઓ તૂટતાં અપેક્ષાથી વધુ માંગ જોવાઇ:
અમદાવાદ,મુંબઈ : ટ્રમ્પે ચીન સાથે હળવાશના સંકેતો આપતાં વિશ્વબજારમાં આજે સોનામાંતીવ્ર કડાકો બોલી જતા તેની સીધી અસર સ્થાનિક સોના-ચાંદી બજાર પર થતાં બંને કિંમતી ધાતુઓમાં ટોચ પરથી ઝડપી પ્રત્યાઘાતી ઘટાડો જોવા મળ્યો હતો અને તેના પગલે બજારમાં ધનતેરસની માગ અપેક્ષાથી સારી રહી હતી તથા હવે દિવાળીના દિવસે પણ માગ સારી રહેવાની આશા બજારના જાણકારો બતાવી રહ્યા હતા. ધનતરેસના દિવસે અમદાવાદ ઝવેરીબજારમાં સોનાના ભાવ ૧૦ ગ્રામદીઠ ઝડપી રૂ.૧૫૦૦ તૂટી ગયા હતા જ્યારે અમદાવાદ ચાંદીના ભાવ કિલોદીઠ ઝડપી રૂ.૫૦૦૦ ગબડયા હતા.
વિશ્વબજારમાં સોનાના ભાવ ઔંશના ૪૩૦૭થી ૪૩૦૮ ડોલર વાળા ઉંચામાં ૪૩૭૮થી ૪૩૭૯ ડોલર થયા પછી ભાવમાં તીવ્ર કડાકો બોલાતાં નીચામાં ભાવ ૪૧૮૬થી ૪૧૮૭ થઈ છેલ્લે ભાવ સપ્તાહના અંતે ૪૨૫૧થી ૪૨૫૨ ડોલર રહ્યાના નિર્દેશો હતા.
દરમિયાન, વિશ્વબજારમાં સોના પાછળ ચાંદીના ભાવ પણ ઔંશના ૫૩.૮૭થી ૫૩.૮૮ વાળા ઉંચામાં ભાવ ૫૪.૪૬થી ૫૪.૪૭ થઈ ગયા પછી ભાવ તૂટી નીચામાં ૫૦.૬૨થી ૫૦.૬૩ થઈ છેલ્લે ભાવ ૫૧.૯૨થી ૫૧.૯૩ ડોલર રહ્યા હતા. વૈશ્વિક પ્લેટીનમના ભાવ ઔંશના ૧૬૨૦ ડોલર રહ્યા હતા. પેલેડીયમના ભાવ ૧૪૬૫ ડોલર રહ્યા હતા.
વિશ્વબજારના સૂત્રોના જણાવ્યા મુજબ અમેરિકાની અમુક બેન્કોમાં બેડલોન વધી ગયાના અને બેન્કોની ધિરાણ સ્થિતિ નબળી પડયાના નિર્દેશો વચ્ચે વિશ્વબજારમાં સોનાના ભાવ ઉછળી ઉંચામાં ૪૩૭૮થી ૪૩૭૯ ડોલર સુધી ગયા હતા પરંતુ ત્યારબાદ અમેરિકાના પ્રમુખ ટ્રમ્પે ચીન સાથે તણાવ ઘટશે એવા સંકેતો આપતાં વિશ્વબજારમાં સોનાના ભાવ ટોચ પરથી ઉંધા માથે પટકાયા હતા. અમદાવાદ બજારમાં ધનતેરસના દિવસે સોનાના ભાવ તૂટી ૯૯૫ના રૂ.૧૩૨૭૦૦ તથા ૯૯૯ના રૂ.૧૩૩૦૦૦ બોલાયા હતા જ્યારે અમદાવાદ ચાંદીના ભાવ ઘટી રૂ.૧૭૦૦૦૦ રહ્યા હતા.
મુંબઈ ઝવેરીબજારમાં આજે શનિવારના કારણે બુલીયન બજાર સત્તાવાર બંધ રહી હતી. મુંબઈ બુલીયન બજારમાં આજે સોનાના ભાવ જીએસટી વગર ૯૯૫ના રૂ.૧૨૯૦૬૫ વાળા રૂ.૧૨૭૬૦૦ રહ્યા હતા જ્યારે ૯૯૯ના ભાવ રૂ.૧૨૯૫૮૪ વાળા રૂ.૧૨૮૧૦૦ બોલાતા થયા હતા.
મુંબઈ ચાંદીના ભાવ જીએસટી વગર રૂ.૧૬૯૨૩૦ વાળા રૂ.૧૬૪૭૦૦ રહ્યા હતા. વૈશ્વિક ડોલર ઈન્ડેક્સ નીચામાં ૯૮.૦૩ થયા પછી ઉંચામાં ૯૮.૫૫ થઈ છેલ્લે ૯૮.૫૪ રહ્યો હતો. મુંબઈ કરન્સી બજારમાં આજે બંધ બજારે રૂપિયા સામે ડોલરના ભાવ રૂ.૮૭.૯૭ વાળા વધી રૂ.૮૮.૦૩થી ૮૮.૦૪ બોલાતા થયા હતા.
બ્રેન્ટક્રૂડના ભાવ બેરલના ૬૦.૭૯ ડોલરવાળા વધી ૬૧.૪૭ થઈ ૬૧.૨૯ ડોલર રહ્યા હતા. યુએસ ક્રૂડના ભાવ ૫૭.૨૯ વાળા વધી ૫૭.૭૨ થઈ છેલ્લે ભાવ ૫૭.૫૪ ડોલર રહ્યા હતા.
