Rajkot News : ગુજરાતમાં આ વર્ષે મગફળીનું વિક્રમજનક ઉત્પાદન થયું અને સપ્લાયમાં પણ વધારો થયો છતાં જાન્યુઆરી માસમાં સિંગતેલના ભાવમાં 20 દિવસમાં રૂ.310 નો તોતિંગ વધારો ઝીંકી દીધા બાદ હવે તેમાં ઘટાડો ધીમી ગતિએ શરુ થયો છે અને ચાર દિવસમાં રૂ.40 નો ઘટાડો ડબ્બે નોંધાયો છે. માંગ સ્થિર, પૂરવઠો વઘ્યો છતાં તેલ લોબીની ભાવ રમત, મગફળીના ન્યુનતમ ભાવ વઘ્યા હતા.
કિંમત ઘટવાની ઝડપ ખુબ જ ઓછી
તા.6,7 જાન્યુઆરીએ સિંગતેલનો 15 કિલો ડબ્બાના મહત્તમ રૂ.2615 ના ભાવે સોદા થતા હતા, આ ભાવ તા.28 જાન્યુઆરી સુધીમાં રૂ.310 નો તોતિંગ વધારો અને તે પણ સીઝનમાં અને મબલખ ઉત્પાદન-ધોધમાર સપ્લાય વચ્ચે ઝીંકી દેવાતા ભાવ રૂ.2925 ની ઉંચી સપાટીએ લઈ જઈ ગત શુક્રવાર સુધી તે ઉંચાઈએ જળવાયા બાદ હવે ઘટાડાનો ક્રમ ધીમા પગલે શરુ કરાયો છે.
સિંગતેલમાં પણ સટ્ટાખોરી
ગત ચાર દિવસમાં આજે ડબ્બાના ભાવ રૂ.40 ઘટીને રૂ.2835-2885ના ભાવે સોદા પડ્યા હતા. જો કે આ ભાવે પણ કપાસિયા કરતા સિંગતેલ રૂ.560 મોંધુ છે.બીજી તરફ, મગફળીના ભાવ પણ આશ્ચર્યજનક રીતે વધઘટ થઈ રહ્યા છે. ગત તા.27 જાન્યુઆરીએ મગફળીના ન્યુનામ ભાવ રૂ.1200 થી મહત્તમ રૂ.1730 રાજકોટ યાર્ડમાં નોંધાયા હતા. પરંતુ, એક સપ્તાહમાં જ ખેડૂતોને મળતા ન્યુનામ ભાવ 125 વધીને રૂ.1325 થયા જ્યારે મહત્તમ ભાવ 180 ઘટીને 1551 સુધીના રહ્યા છે.
સોના-ચાંદી જેવી સટ્ટાખોરી
સોના-ચાંદીની બજાર એક સમયે માંગ-પૂરવઠાના આધારે ભાવમાં આંશિક 10-15 ટકાની વધઘટ થતી પરંતુ, હવે આ બજાર અસલી ગ્રાહકોને બદલે સટ્ટાખોરો,એકના ડબલ ઈચ્છતા રોકાણકારોના ના હાથમાં ચાલી જતા અસ્થિર થઈ છે. હવે સિંગતેલના કૃત્રિમ રીતે વઘુ વધતા અને ઓછા ઘટતા ભાવમાં પણ સટ્ટાખોરી,નફાખોરીની ગંધ આવી રહી છે. ઉલ્લેખનીય છે કે સિંગતેલ ગુજરાતના વાતાવરણને સૌથી વધુ માફક આવતું ખાદ્યતેલ કહેવાય છે. જ્યારે તેમાં પણ સટ્ટાખોરી ગુજરાતીઓને ખિજવી શકે તેમ છે.
આ પણ વાંચો : સોનું 2 લાખને પાર થશે! તેજીની ભવિષ્યવાણી વચ્ચે સોનું બે દિવસમાં 300 ડૉલર વધ્યું
