– દેશમાં છેલ્લા 10-15 વર્ષથી લોકતંત્ર હાઈજેક કરી દેવાયું છે : રાહુલ
– વોટ ઓનલાઈન ડિલીટ કરી શકાય નહીં, રાહુલના આરોપો તદ્દન ખોટા અને પાયાવિહોણા : ચૂંટણી પંચનો જવાબ
નવી દિલ્હી : ચૂંટણી પંચ પર ‘વોટ ચોરી’ના આક્ષેપો કરી ‘એટમ બોમ્બ’ ફોડનાર કોંગ્રેસ નેતા રાહુલ ગાંધીએ ગુરુવારે સીધા જ મુખ્ય ચૂંટણી કમિશનર જ્ઞાનેશ કુમાર પર દેશમાં લોકતંત્રનો નાશ કરનારા અને ‘વોટ ચોરો’ને છાવરવાનો આક્ષેપ કર્યો છે. રાહુલ ગાંધીએ ગુરુવારે કર્ણાટકની આલંદ વિધાનસભા ક્ષેત્રનો ડેટા દર્શાવતા સોફ્ટવેરની મદદથી પદ્ધતિસર કોંગ્રેસ મતદારોના વોટ મતદાર યાદીમાંથી ડિલીટ કરાઈ રહ્યા હોવાનો આક્ષેપ કર્યો હતો. આ સાથે તેમણે સ્પષ્ટતા કરી હતી કે, આ હાઈડ્રોજન બોમ્બ નથી, તે તો હજુ બાકી છે. રાહુલ ગાંધીએ એમ પણ કહ્યું કે, તેમની પાસેના પુરાવા જાહેર થયા પછી વડાપ્રધાન મોદી દેશને મોં બતાવી શકશે નહીં.
