– ગૂગલ, રિલાયન્સ અને એરટેલના કેબલ્સ હૂથીઓ કાપી નાખે તેવો ડર
– લાલ સમુદ્રમાં યુરોપ સાથે જોડતા કેબલ્સ કપાય તો પણ ઇન્ટરનેટને ઠપ થતું રોકવા કંપનીઓએ વૈકલ્પિક આયોજન પર કામ શરૂ કર્યું
નવી દિલ્હી : અમેરિકા અને ઇઝરાયેલ માટે માથાનો દુ:ખાવો બનેલા હુથી બળવાખોરો હવે ભારતને પણ અસર કરે તેવી સંભાવના છે. રેડ સીમાં યમનના હુથીએ તનાવ વધારી દીધો છે. તેના લીધે ભારતના ઇન્ટરનેટ પર અસર પડી શકે છે. વાસ્તવમાં ભારતના મોટાભાગના ઇન્ટરનેટ કેબલ્સ આ જ રસ્તે થઈને જાય છે. જો આ કેબલ્સને નુકસાન થયું તો ભારતમાં ઇન્ટરનેટ ઠપ પડી શકે છે.
આ પરિસ્થિતિથી બચવા માટે કેબલ કંપનીઓએ તના પ્રયત્નો વધુ વેગવંતા બનાવ્યા છે. ગૂગલ, એરટેલ અને જિયો જેવી કંપનીઓનું ઇન્ટરનેટ હાલમાં ભયમાં છે. ભારતની ડિજિટલ ઇકોનોમી માટે રેડ સીનો રસ્તો અત્યંત મહત્ત્વનો માનવામાં આવે છે. અહીં કહી શકાય કે આ રસ્તેથી પસાર થતાં કેબલ પર જ ભારતની ડિજિટલ ઇકોનોમી ટકેલી છે. આ કેબલ્સ ભારતને વર્લ્ડ ઇન્ટરનેટ સાથે જોડવાનું કામ કરે છે.
અહીંથી ગૂગલની બ્લૂ રમન, એરટેલની ટુ આફ્રિકા અને સી મી વી સિક્સ તથા રિલાયન્સ જિયોની ઇન્ડિયા-યુરોપ એક્સપ્રેસ જેવી મહત્ત્વપૂર્ણ કેબલ્સ મુંબઈ અને ચેન્નાઈના દરિયાકાંઠા સુધી પહોંચી રહી છે. કેબલ કંપનીઓએ આ સ્થિતિનો સામનો કરવા માટે તૈયારી શરૂ કરી દીધી છે.કંપનીઓ વધુને વધુ ફાઇબર જોડી રહી છે, જેથી ઇન્ટરનેટ કેબલ્સ કપાય તો તેનો ઉપયોગ કરી શકાય. રેડ સીમાં વધતા ભયને જોતાં લાઇમસ્ટોર્મ ગુ્રપના સીઇઓ અને મેનેજિંગ ડિરેક્ટર અમજિત ગુપ્તા જણાવે છે કે આ ક્ષેત્રમાં તનાવ વધી ગયો છે. જો કોઈપણ મુશ્કેલી આવે તો કેબલને રિપેર કરવા અઘરા હશે. આ જ કારણે કેટલીય કંપનીઓ હવે રેડ સીને છોડીને જમીન પર કેબલ્સ બિછાવવાનો વિકલ્પ અજમાવી રહી છે. જો કે આ એક મોંઘી પ્રક્રિયા છે. આમ કરવાથી ડેટા સર્વિસિસ અને ક્લાઉડ સેન્ટરનો ખર્ચ વધી જશે.
રેડ સીમાં બિછાવાયેલા કેબલ્સને રિપેર કરવા જહાજો જાય તો પણ હૂથીઓ તેમની પાસેથી ખંડણી વસૂલે છે. કેબલ કાપવાનો ડર બતાવી હૂથીઓએ કેટલાક દેશો પર દબાણ કાયમ કર્યુ છે. અમેરિકાએ તેમને પદાર્થપાઠ શીખવાડવા તેમના પર હુમલા કર્યા, પરંતુ તે હજી પણ સુધર્યા નથી.
