વડોદરા, તા.7 વડોદરા મ્યુનિસિપલ કોર્પોરેશનની ગત વર્ષ-૨૦૨૧માં યોજાયેલી ચૂંટણીમાં કુલ ૧૯ વોર્ડ પૈકી ૧૬ વોર્ડમાં તો ભાજપની આખે આખી પેનલ જીતી ગઇ હતી. કોંગ્રેસની માત્ર એક જ પેનલ વિજતા બની હતી.
વર્ષ-૨૦૧૦માં ભાજપે ૭૫માંથી ૬૧ બેઠકો પર કબજો કર્યો હતો. વર્ષ-૨૦૧૫માં કુલ ૧૯માંથી ભાજપે માત્ર ૧૨ પેનલો જીતી હતી પરંતુ ત્યાર પછીની વર્ષ-૨૦૨૧ની ચૂંટણીમાં ૧૬ પેનલ પર કબજો જમાવ્યો હતો. વર્ષ-૨૦૧૦ની સરખામણી કરીએ તો વર્ષ-૨૦૧૫માં ભાજપની બેઠકો ઘટવાની સાથે પેનલો પણ ઓછી હતી. વર્ષ-૨૦૧૫માં કોંગ્રેસે વોર્ડ નંબર-૧ અને વોર્ડ નંબર-૧૬ એમ બે પેનલ જીતવામાં સફળતા પ્રાપ્ત કરી હતી પરંતુ વર્ષ-૨૦૨૧માં કોંગ્રેસ માત્ર એક પેનલ પર જ વિજેતા બની શક્યું હતું.
વડોદરા કોર્પોરેશનની ચૂંટણીમાં વર્ષ-૨૦૨૧માં ઓછું મતદાન છતાં ભાજપે ૬૯ સીટો પર કબજો કર્યો હતો. ભાજપે સાવ નવા ચહેરાઓને ટિકિટ આપી હતી. ગત ચૂંટણીમાં એક સાથે ૪૭ એવા સભ્યો ચૂંટાયા હતા કે જેઓ પ્રથમ વખત જ કોર્પોરેટર બન્યા હતાં. જેમાં ભાજપ ઉપરાંત એક કોંગ્રેસના કોર્પોરેટરનો પણ સમાવેશ થતો હતો. ગત ચૂંટણીમાં ભાજપે એક સાથે ૪૨ કોર્પોરેટરોની ટિકિટ કાપી નાંખી ઘેર બેસાડી દીધા હતાં જ્યારે ૧૦ પૂર્વ કોર્પોરેટરો તેમજ ૧૫ અગાઉના બોર્ડના કોર્પોરેટરોને રિપિટ કર્યા હતાં. આ ચૂંટણીમાં કોંગ્રેસના માત્ર ૭ કોર્પોરેટરો જ ચૂંટાયા હતાં.
વર્ષ-૨૦૨૧ની કોર્પોરેશનની ચૂંટણીમાં રસપ્રદ બાબત એ રહી હતી કે ભાજપના પ્રથમ વખત જ ચૂંટણી લડતા માત્ર ૨૨ વર્ષની વયના બે ઉમેદવારો ચૂંટણી જંગ જીત્યા હતાં. જેમાં શ્રીરંગ રાજેશ આયરે વડોદરામાં સૌથી વધુ૨૭૨૩૬ મત સાથે ચૂંટણીમાં વિજેતા બન્યા હતાં. જ્યારે માત્ર ૨૨ વર્ષના મહિલા ઉમેદવાર ભૂમિકા રાણા પણ ચૂંટણી જંગ જીત્યા હતાં. તેમને વોર્ડ નંબર-૭માં૧૮૨૬૯ મત મળ્યા હતા. ભાજપના વિજયી થયેલા ૬૯ ઉમેદવારોમાંથી ૧૪ એવા ઉમેદવારો હતા કે જેમણે ૨૦ હજારથી વધુ મત મેળવ્યા છે.
ગત ચૂંટણીમાં કોંગ્રેસના ૭ સહિત કુલ ૧૩૬ ઉમેદવારોની ડિપોઝિટ ડૂલ થઇ હતી
વર્ષ-૨૦૨૧માં વડોદરા મ્યુનિસિપલ કોર્પોરેશનની યોજાયેલી ચૂંટણીમાં કુલ ૧૩૬ ઉમેદવારોની ડિપોઝિટ ડૂલ થઇ ગઇ હતી. આ ઉમેદવારોમાં કોંગ્રેસના ૭ ઉમેદવારોનો પણ સમાવેશ થાય છે. માત્ર કોગ્રેસ જ નહી પરંતુ આપ, બીએસપી, આરજેપી, બીટીપી અને તમામ અપક્ષોની ડિપોઝિટ જપ્ત થઇ ગઇ હતી.
