મુંબઈ : અમેરિકા દ્વારા સોના પર ટેરિફ મુદ્દે હજુપણ પ્રવર્તતી અસ્પષ્ટતા અને રશિયા તથા અમેરિકાના પ્રમુખોની ૧૫ ઓગસ્ટે મળી રહેલી બેઠકમાં યુક્રેન સાથે રશિયા યુદ્ધવિરામ કરવા તૈયાર થશે તો ગોલ્ડની સેફ હેવન માગ ઘટી જશે તેવી ધારણાંએ સપ્તાહના પ્રથમ દિવસે વૈશ્વિક સોનામાં નોંધપાત્ર પીછેહઠ થતાં ઘરઆંગણે પણ ભાવ રૂપિયા ૧,૦૦,૦૦૦ની અંદર ઊતરી ગયા હતા.
ટેરિફ વોર શરૂ થવાથી ઔદ્યોગિક માગ નબળી પડવાની શકયતાએ વૈશ્વિક ચાંદી ૩૮ ડોલરની અંદર ઊતરી ગઈ હતી. અમેરિકામાં મંગળવારે જાહેર થનારા રિટેલ ફુગાવાના આંક પર પણ રોકાણકારોની નજર રહેલી છે. સ્થાનિક મુંબઈ ઝવેરી બજારમાં ૯૯.૯૦ સોનુ પ્રતિ દસ ગ્રામ રૂપિયા ૧,૦૦,૦૦૦ની અંદર ઊતરી જીએસટી વગર રૂપિયા ૯૯૯૫૭ જ્યારે ૯૯.૫૦ના દસ ગ્રામના જીએસટી વગરના ભાવ રૂપિયા ૯૯૫૫૭ મુકાતા હતા.
જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગરના રૂપિયા ૧૧૩૫૦૧ બોલાતા હતા. જીએસટી સાથે ભાવ ત્રણ ટકા ઊંચા મુકાતા હતા.
અમદાવાદ ઝવેરી બજારમાં ૯૯.૯૦ દસ ગ્રામ સોનાના ભાવ રૂપિયા ૧૦૩૦૦૦ જ્યારે ૯૯.૫૦ના પ્રતિ દસ ગ્રામ રૂપિયા ૧૦૨૭૦૦ મુકાતા હતા. ચાંદી .૯૯૯ એક કિલોના રૂપિયા ૧૧૪૦૦૦ બોલાતા હતા.
વિશ્વ બજારમાં સોનું પ્રતિ ઔંસ ૪૭ ડોલર જેટલુ ઘટી ૩૩૫૦ ડોલર મુકાતુ હતું. ચાંદી ઔંસ દીઠ ૩૮ ડોલરની અંદર સરકી ૩૭.૮૦ ડોલર મુકાતી હતી. અન્ય કિંમતી ધાતુ પ્લેટિનમ ૧૩૨૫ ડોલર જ્યારે પેલેડિયમ ૧૧૪૫ ડોલર મુકાતુ હતુ.
રશિયા તથા અમેરિકાના પ્રમુખો વચ્ચે શુક્રવારે મળનારી બેઠકમાં યુક્રેન સાથે યુદ્ધવિરામ કરવા રશિયા સહમત થશે તો સોનાની સેફ હેવન માગ ઘટવાની ધારણાં મૂકવામાં આવી રહી છે. આ ઉપરાંત મંગળવારે અમેરિકાના ફુગાવાના જાહેર થનારા આંકડા પર પણ બજારની નજર છે.
સપ્ટેમ્બરમાં સાઉદી અરેબિયા ખાતેથી ચીનને ક્રુડ તેલનો પૂરવઠો ઘટવાના અહેવાલે ક્રુડ તેલમાં ભાવ ઊંચકાયા હતા. નાયમેકસ ડબ્લ્યુટીઆઈ ક્રુડ તેલ બેરલ દીઠ ૬૪.૨૮ ડોલર જ્યારે આઈસીઈ બ્રેન્ટ ક્રુડ ઓઈલ બેરલ દીઠ ૬૭ ડોલર મુકાતુ હતુ.
