એક તરફી પ્રેમ કે બીજુ કંઇ ….. ચોંકાવનારો કિસ્સો
ઉશ્કેરાયેલા શખ્સે લાફા મારી દઇ બાઇક પર બેસાડવા માટે બળજબરી કરતાં સગીરા દ્વારા બુમરાણ મચાવી દેવાઇ હતી
ગાંધીનગર : રીલ્સ અને ફિલ્મોથી પ્રેરાઇને યુવા પેઢી હિરોગીરી કરીને
સામાજીક અપરાધ કરવા પર ઉતરી આવે છે. આવો સેક્ટર ૨૪માં બનેલો ચોંકાવનારો કિસ્સો
સેક્ટર ૨૧ પોલીસ મથકના ચોપડે નોંધાયો છે. જેમાં સગીરાએ સાથે જવા ઇન્કાર કરતાં
યુવકે એસીડ એટેકની ધમકી આપી હતી. વધુમાં ઉશ્કેરાયેલા શખ્સે લાફા મારી બાઇક પર
બેસાડવા માટે બળજબરી કરતાં સગીર બાળાએ બુમરાણ મચાવી દેતા શખ્સ નાસી ગયો હતો.
પોલીસ મથકમાં સગીર બાળાની માતા દ્વારા તેની દિકરીની છેડતી
કરવા સંબંધમાં ફરિયાદ નોંધાવવામાં આવી છે. તેમાં આરોપી તરીકે સેક્ટર ૨૪માં રહેતા
મુકેશ ભીલ નામના શખ્સનું નામ આપવામાં આવ્યું છે. ફરિયાદમાં જણાવવામાં આવ્યા
પ્રમાણે ત્રણ દિવસ પહેલા સાંજના અરસામાં ફરિયાદીની દિકરી કામસર ઘરેથી નીકળી હતી.
દરમિયાન બાઇક પર આવેલા આરોપીએ તેની પાછળ બાઇક ચલાવીને પીછો કરવાનું શરૃ કર્યુ હતી.
થોડો એકાંત જેવો વિસ્તાર આવતા આરોપી બાઇક લઇને સગીરા પાસે પહોંચ્યો હતો અને સાથે
આવવા કહ્યુ હતું. બાળાએ ઇન્કાર કરતા આરોપીએ તેને લાફા મારી દીધા હતાં. સાથે બાવડુ
પકડીને બાઇક પર બેસાડવા બળજબરી કરવા લાગ્યો હતો. ગભરાઇ ગયેલી સગીરાએ આખરે બચાવો, બચાવોની બુમો
પાડવા લાગી હતી. આસપાસના લોકોની નજર આ તરફ ફરતાં આરોપીએ બાઇક લઇને ચાલતી પકડી હતી.
પરંતુ જતાં જતા એસીડ ફેંકીને ચહેરો બગાડી નાંખીશ તેવી ધમકી આપી હતી. ધરે આવીને
સગીરાએ આ વતા કરતાં તેની માતા દ્વારા સેક્ટર ૨૧ પોલીસ મથકમાં ફરિયાદ નોંધાવવામાં
આવતાં પોલીસે તપાસ શરૃ કરી હતી.
