ખિસકોલી સર્કલ પાસે આવેલ વુડા આવાસ યોજનામાં મેઇન્ટેનન્સના અભાવે પરિસ્થિતિ દયનીય બની છે. ડ્રેનેજની લાઈનો ચોકઅપ થતા દૂષિત પાણી ચારે તરફ ફરી વળ્યા છે. પીવાનું પાણી પૂરતા પ્રમાણમાં મળી રહ્યું નથી અને ડોર ટુ ડોરના વાહનો પણ નિયમિત નથી. ડ્રેનેજના પાણી પીવાના પાણીમાં ભળી રહ્યા છે. સફાઈના અભાવે ચારે તરફ ગંદકી જોવા મળે છે. આવા ખખડધજ બનવા સાથે પ્રાથમિક સુવિધાના અભાવે રહીશો પારાવાર હાલાકી ભોગવી રહ્યા છે. રહીશોએ આજે એકત્ર થઈ તંત્ર વિરુદ્ધ આક્રોશ દર્શાવ્યો હતો. રહીશોને રોગચાળાનો ભય સતાવી રહ્યો છે. અનેક વખત તંત્રને રજૂઆત કરવા છતાં કોઈ સાંભળતું નથી તેવો આક્ષેપ રહીશોએ કર્યો હતો.
