મુંબઈ : અમેરિકન ફેડરલ રિઝર્વ દ્વારા વ્યાજ દરના નિર્ણય પહેલા વિશ્વ બજારમાં કિંમતી ધાતુમાં વિક્રમી રેલીને બ્રેક લાગી હતી અને ભાવમાં નોંધપાત્ર પીછેહઠ જોવા મળી હતી. વ્યાજ દરનો નિર્ણય આવે તે પહેલા હેજ ફન્ડો દ્વારા પ્રોફિટ બુકિંગ આવ્યાનું ચર્ચાતુ હતું. વ્યાજ દરમાં ઘટાડો નિશ્ચિત છે પરંતુ કેટલો આવે છે તેના પર બજારની નજર રહેલી છે. વિશ્વ બજાર પાછળ ઘરઆંગણે પણ સોનાચાંદીમાં નરમાઈ આવી હતી. ચાંદીમાં રૂપિયા ૩૫૦૦નું ગાબડું જોવા મળ્યું છે. ક્રુડ ઓઈલમાં પણ ભાવમાં ઘટાડા તરફી વલણ જોવા મળ્યું હતું.
ઘરઆંગણે મુંબઈ ઝવેરીબજારમાં ૯૯.૯૦ દસ ગ્રામ સોનાના જીએસટી વગરના ભાવ રૂપિયા ૧૦૯૭૩૩ મુકાતા હતા. ૯૯.૫૦ દસ ગ્રામના જીએસટી વગર ભાવ રૂપિયા ૧૦૯૨૯૪ મુકાતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલોના જીએસટી વગર ભાવ રૂપિયા ૩૫૪૪ ઘટી રૂપિયા ૧૨૫૭૫૬ બોલાતા હતા. જીએસટી સાથે ભાવ ત્રણ ટકા ઊંચા મુકાતા હતા.
અમદાવાદ બજારમાં ૯૯.૯૦ દસ ગ્રામ સોનાના ભાવ રૂપિયા ૧૧૩૭૦૦ જ્યારે ૯૯.૫૦ના પ્રતિ દસ ગ્રામ રૂપિયા ૧૧૩૪૦૦ બોલાતા હતા. ચાંદી .૯૯૯ એક કિલોના રૂપિયા ૧૨૮૦૦૦ કવોટ થતા હતા. મંગળવારની સરખામણીએ ચાંદીમાં રૂપિયા ૩૫૦૦નો ઘટાડો જોવાયો હતો.
અમેરિકન ફેડરલ રિઝર્વના વ્યાજ દરના નિર્ણય પૂર્વે વિશ્વ બજારમાં કિંમતી ધાતુમાં વિક્રમી સપાટીએ પ્રોફિટ બુકિંગે ભાવમાં નરમાઈ જોવા મળી હતી. સોનું પ્રતિ ઔંસ ૩૬૭૯ ડોલર જ્યારે ચાંદી ઔંસ દીઠ ૪૨ ડોલરની અંદર ઊતરી પ્રતિ ઔંસ ૪૧.૯૦ ડોલર મુકાતી હતી. અન્ય કિંમતી ધાતુ પ્લેટિનમ ઘટી ૧૩૭૬ ડોલર જ્યારે પેલેડિયમ ઔંસ દીઠ ૧૧૬૩ ડોલર મુકાતુ હતું.
ક્રુડ તેલમાં બે દિવસના સુધારાને બ્રેક લાગી હતી. નાયમેકસ ડબ્લ્યુટીઆઈ પ્રતિ બેરલ ૬૪.૩૯ ડોલર જ્યારે આઈસીઈ બ્રેન્ટ ક્રુડ ઓઈલ મોડી સાંજે પ્રતિ બેરલ ૬૮.૩૬ડોલર મુકાતું હતું.
