– ગટરમાં કચરો નાખતા વેપારીઓ-રહિશો સામે કાર્યવાહી કરવા માંગ
– ટ્રાફિકથી ધમધમતા રોડ નજીક ખુલ્લી વરસાદી ગટરને કન્સિલ્ડ કરવા પ્રથમ અગ્રમતા આપવા માંગ
વિરમગામ : વિરમગામ શહેરમાંથી પસાર થતી ખુલ્લી વરસાદની ગટરની અંદર અવારનવાર વાહનો પશુ પડવાની ઘટનાઓ પ્રકાશમાં આવે છે ત્યારે આજે ગોલવાડી દરવાજા સામે આવેલ ખુલ્લી વરસાદી ગટરમાં પાર્ક કરેલ બંધ છકડો મિક્સર મશીન સાથે ખાબક્યો હતો .
વિરમગામ શહેરમાંથી અંદાજી ચાર કિલોમીટર લાંબી ખુલ્લી વરસાદી કોટ બહારથી પસાર થાય છે. આ વરસાદી ગટરમાં બારેમાસ ગટરના પાણી કાદવ કીચડ કચરો પ્લાસ્ટિકની થેલી ભરેલી હોય છે. આજે શનિવારે સવારે છકડા મિક્સર મશીન લઈ ચાલક આવેલો અને પાર્ક કરી કોઈ કામ અર્થે બહાર ગયો ત્યારે કોઈ કારણોસર છકડો મિક્સર મશીન સાથે ગટરમાં પડયો હતો. સદ્દનસીબે આ સમયે છકડામાં કોઈ સવાર ન હતું. બાદમાં ટ્રેક્ટર સાથે સાથે બાંધીને છકડાને બહાર કાઢયો હતો.
અત્રે ઉલ્લેખનીએ છે કે વિરમગામ શહેરમાંથી પસાર થતી ખુલ્લી વરસાદી ગટર કન્સિલડ કરવાનું કામ ખાનગી એજન્સીને કરોડોના ખર્ચે કામ સોંપવામાં આવ્યું છે. ખુલ્લી વરસાદી ગટર કન્સિલડ કરવાનું કામ નીલકી રેલવે ઓવર બ્રિજથી ભોજવા ગામ તરફ તેમજ તાલુકા સેવા સદન બહાર કામગીરી ચાલી રહી છે. ગોલવાડી દરવાજાથી ભરવાડી દરવાજા વચ્ચે આવેલી વરસાદી ગટરની બાજુમાંથી જ રોડ પસાર થાય છે. સતત ટ્રાફિકથી ધમધમતો રોડ છે જેથી અવારનવાર વરસાદી ગટરમાં વાહનો અને પશુઓ પડવાની ઘટના બને છે. ત્યારે ગોલવાડી દરવાજાથી ભરવાડી દરવાજા વચ્ચે આવેલ વરસાદી ગટરને કન્સીલડ કરવા માટે પ્રથમ અગ્રમતા આપવી જોઈએ તેવું શહેરીજનો અને વેપારીઓમાંથી માંગ ઉઠી છે.
