– ફાગવેલ તાલુકો જાહેર કર્યા બાદ વડામથકનો વિવાદ વકર્યો
– કપડવંજની હદના ગામોને 22 કિ.મી. દૂર ફાગવેલ જવાની નોબત : જાહેર થયેલા કાપડીવાવ- ચિખડોલને જ વડુમથક રાખવાની માંગણી સાથે ગ્રામજનોની પ્રાંત અધિકારીને રજૂઆત
નડિયાદ : ખેડા જિલ્લામાં કપડવંજ અને કઠલાલના કેટલાક ગામોને જોડી ૧૧મા તાલુકા તરીકે ફાગવેલની જાહેર બાદ વિવાદ સર્જાયો છે. સરકારે ફાગવેલને તાલુકો જાહેર કરી કાપડીવાવ- ચિખડોલને મુખ્ય મથક જાહેર કરતા વિરોધ વચ્ચે ફાગવેલને જ વડુ મથક રાખવાની માંગણી થઈ હતી. હવે આ અંગે સરકારમાં રજૂઆતો પહોંચતા વિચારણા હેઠળ મુદ્દો છે. તેવા સંજોગોમાં ફાગવેલને વડુ મથક બનાવવા સામે ૨૨ ઉપરાંત ગામના સરપંચ અને ગ્રામજનોએ વિરોધ કરતા મામલો ગરમાયો છે.
રાજ્ય સરકારે ખેડા જિલ્લામાં ફાગવેલને અલગ તાલુકો બનાવવા સત્તાવાર મંજૂરી આપતા ફાગવેલ તાલુકાનું વડુ મથક કાપડીવાવ- ચિખડોલ રાખવામાં આવ્યું છે. ત્યારે સરકારના નિર્ણયને વીર ભાથીજી ધામનું અપમાન ગણાવી ફાગવેલના વીર ભાથીજી મંદિર ટ્રસ્ટ સહિત અન્ય લોકોએ વિરોધ કરી ફાગવેલને જ વડુમથક રાખવા માંગણી કરી હતી. આ અંગે વાત મુખ્યમંત્રી સુધી પહોંચતા હવે સરકાર આ મામલે વિચારણા કરી ફેરફાર કરે તેવી શક્યતાઓ દેખાઈ રહી છે.
આ વચ્ચે આજે ફાગવેલ તાલુકામાં સમાવેલા ૩૭ ગામોમાંથી ૨૨ ઉપરાંત ગામોના સરપંચ અને નાગરીકોએ પ્રાંત અધિકારી સમક્ષ નવી રજૂઆત કરી હતી. રજૂઆતમાં ગ્રામજનોએ જણાવ્યું છે કે, કાપડીવાવ- ચિખડોલને જ મુખ્યમથક રાખવામાં આવે તેવી માંગણી કરાઈ છે. ફાગવેલને વડુ મથક જાહેર કરાય તેવા સંજોગોમાં કપડવંજની હદમાં આવતા ગામોને અન્યાય થાય તેમ છે. તાલુકાના કામ માટે ૨૨ કિ.મી. દૂર ફાગવેલ જવાની સ્થિતિ ઉભી થાય તેમ છે. ત્યારે હવે ફાગવેલની રચના બાદ સરકાર સમક્ષ નવી ભાંજગઢ શરૂ થઈ છે. જેમાં નિર્ણય કરવામાં રાજ્ય સરકારને અનેક વિરોધનો સામનો કરવો પડશે.
ફાગવેલ તાલુકાના 37 ગામોની હદમાં સૌથી વચ્ચેનો કાપડીવાવ- ચિખડોલ વિસ્તાર
કઠલાલ અને કપડવંજ બંને તાલુકામાંથી નવા તાલુકામાં લેવાયેલા ૩૭ ગામોની હદમાં સૌથી વચ્ચેનો વિસ્તાર કાપડીવાવ-ચિખડોલનો છે. જેથી તેને વડુમથક બનાવે તો તમામ ગામોને મુખ્યમથક સાથે જોડી શકાય. તમામ ગામોને કાપડીવાવ મહત્તમ ૧૨થી ૧૫ કિલોમીટરનું જ અંતર રહે. મહત્વના રોડનું જોડાણ પણ આ ગામમાં હોવાના કારણે કાપડીવાવ-ચિખડોલને વડુમથક સરકાર દ્વારા જાહેર કરાયું છે.
ફાગવેલને વડુમથક બનાવે તો કપડવંજના ગામોને હાલાકી થશે
ફાગવેલ તાલુકામાં કપડવંજમાંથી જે ગામો જોડાયા છે, તે કપડવંજની હદ સમીને અડીને આવેલા છે. આ ગામોથી ફાગવેલ ગામનું અંતર ૨૦થી ૨૨ કિલોમીટર મહત્તમ થાય છે. જેથી આ ગામોના લોકોને સંભવિત ફાગવેલ મુખ્યમથક હોય તો ૭થી ૧૦ કિલોમીટરનું અંતર વધી જાય તેમ છે. જ્યારે કાપડીવાવ-ચિખડોલ કઠલાલ અને કપડવંજ બંનેમાંથી લેવાયેલા ગામો માટે ૧૦થી ૧૨ કિલોમીટરના અંતરે જ છે.
