સવાણી હોસ્પિટલ પાસે રેસ્ટોરન્ટ ધરાવતા વેપારીને ધમકી : આરોપીએ વેપારીને કારમાં બેઠા-બેઠા મૂક્કા માર્યા, ગાંધીગ્રામ-૨ પોલીસ મથકમાં ફરિયાદ
રાજકોટ, : વિમલનગર મેઇન રોડ મેરી ગોલ્ડ એપાર્ટમેન્ટમાં રહેતા અને સવાણી કીડની હોસ્પિટલ પાસે પિતૃકૃપા નામની રેસ્ટોરન્ટ ધરાવતા દિલીપભાઈ ચીખલિયા (ઉ.વ. 45)ને વ્યાજખોર દીપક જાદવભાઈ કાસુન્દ્રાએ મારકૂટ કરી, ધમકી આપ્યાની ફરિયાદ ગાંધીગ્રામ-૨ પોલીસ મથકમાં નોંધાઇ છે.
ફરિયાદમાં દિલીપભાઈએ જણાવ્યું છે કે 6 મહિના પહેલા મિત્ર એવા આરોપી પાસેથી ધંધા માટે રૂ. 1.50 લાખ 5 ટકા વ્યાજે લીધા હતાં. બદલામાં પત્ની ધરતીબેનની સોનાની બે કડલી ગિરવે મૂકી હતી. દર મહિને આરોપીને રૂ. 7500 વ્યાજ પેટે ચૂકવતા હતા. પાંચ મહિના સુધી રૂ. 37,500 વ્યાજ પેટે ચૂકવ્યા હતાં.
ગઇ તા. 1ના રોજ રાત્રે રેસ્ટોરન્ટે હાજર હતા ત્યારે આરોપી કાર લઇને આવ્યો હતો અને તેને બોલાવતા ગયા હતાં. આરોપીએ આ મહિનાના વ્યાજ અને મૂડીનું શું થયું તેમ પૂછતાં કહ્યું કે હાલ મારી પાસે મૂડી નથી, વ્યાજ આપી દઇશ. આ બાબત આરોપીને સારી નહીં લાગતા ઝગડો કરી, ગાળો ભાંડવાનું શરૂ કર્યું હતું.
એટલું જ નહીં એમ પણ કહ્યું કે તારાથી પૈસા મેળ ન થાય તો તારી ઘરવાળીને મૂકી જા. જેથી આરોપીને આવી ખરાબ વાતો કરવાની ના પાડતા ઉશ્કેરાઇ જઇ કારમાં બેઠા-બેઠા તેના મોઢા અને માથાના ભાગે ત્રણેક ઢીકા મારી દીધા હતા. સાથેસાથ ઝપાઝપી પણ કરતા મૂંઢ ઇજા થઇ હતી. આસપાસના લોકો ભેગા થઇ જતાં આરોપીને રેસ્ટોરન્ટમાં આવી વાત કરવાનું કહેતા, ત્યાં પણ ઝગડો કરી જતો રહ્યો હતો. જતાં-જતાં વ્યાજના રૂપિયા અને મૂડી આપવી જ પડશે નહીંતર જોયા જેવી થશે તેવી ધમકી પણ આપી હતી. આરોપી ગુંજન પાર્ક મેઇન રોડ પર હેવલોક હાઇટ્સમાં રહે છે. ગાંધીગ્રામ-૨ પોલીસે બીએનએસ અને મની લેન્ડની કલમો હેઠળ ગુનો દાખલ કરી તપાસ હાથ ધરી છે.
